Бүгүҥҥү күн туругунан Атамай нэһилиэгэр 278 ыанар ынахтан 98 төрөөн турар, бу 35,3% тэҥнэстэ. Үүт 363 тн былааннаммытыттан бэс ыйын түмүгүнэн 84,5 тн туттардылар. Былаан 23,3% туолан иһэр. Ааспыт сыл баччаларга 79,9 тн ыаммыт эбит.
462 биэттэн 298 төрөөтө (64,5%). Сорох хаһаайыстыбалаах дьон биллэрэ иликтэр. Ол иһин ити көрдөрүү чопчулана илик.
Түргэн салааны сайыннарар бырагыраама чэрчитинэн нэһилиэккэ 23 сибиинньэ, 129 куурусса, 12 бройлер, 2 хаас оҕото, 14 индюк кэлэн тарҕаммыта. Дьон барыта докумуонун туттарбытын кэннэ, атыыласпыт сууммаларын 40% субсидияланыа, уотурбалара түҥэтилиннэ.
Окко былааммыт 1442,12 тн. Быйыл от үүнүүтэ үчүгэй, халлаан туран эрэ биэрдэр от үлэтэ күргүөмнээхтик барыа.
Окко киирии бу ый ортотуттан маассабай буолуо. Атырдьах ыйа ардахтаах буолуо диэн сабаҕалыыбыт. Санатан эттэххэ, быйыл от тиэйиитигэр харчы көрүллэрэ биллибэт. Онон оппутун бэйэбит испититтэн булунуохтаахпыт.
Анисия Терентьева