Биhиги аҕабыт Дмитрий Федорович Степанов суоппар идэтин баһылаан, 1968 с. ыла суоппарынан үлэлээбитэ. Бастаан райветстанцияҕа ДУК массыына суоппарынан үлэҕэ киирэн, оччотооҕу бэтэринээрдэри кытта Николай Бекасовы, Степан Семеновы, Семен Тимофеевы, Людмила Бушкованы, Лидия Тихонованы уо.д.а кытта тэҥҥэ ветеринарнай сулууспаҕа үлэтин саҕалаабыта. Бастакы улууска кэлбит УАЗ массыынаны ветстанцияҕа 1968 с. анаабыттара.
Ол курдук, бруцеллезнай изолятордарга дезинфекция эмин тириэрдэрэ, чинчийиигэ хаан ылааччылары, быhыы оҥорооччулары таhара. Ону таһынан ветстанцияҕа тутуллуохтаах эбийиэк маhын, сайыннары-кыhыннары производственнай отделын оhоҕор оттук маhы кэрдэрэ.
Оччотооҕу кэмнэ элбэх оҕолоох ыал аҕата хамнаhа кыратыттан күhэллэн, Райпотребсоюзка автолавка суоппарынан 1971 с. үлэлээбитэ. Бу кэмнэргэ биhиги улууска суол-иис мөлтөҕөр, кини элбэх бородууктаны, малы-салы нэhилиэктэргэ тириэрдэн, барытын бэйэлэрэ тиэнэн-сүөкээн таhаллара. Хас рейса аайы куоракка наадаларыгар киирээччилэри буор босхо илдьэллэрэ-аҕалаллара. Күн аайы массыыналарын бытарҕан тымныыны, өҥүрүк куйаастан чаҕыйбакка, түүннэри-күнүстэри массыыналарын оҥостон айанныыллара.
Сэбиэскэй былаас үгэннээн турар кэмигэр киниэхэ үрдүк таhаарыылаах үлэтин иhин хаста да Социалистическай үлэ удаарынньыга оҥороннор, слекка кыhыл былааҕы туттарбыттарын өйдүүбүн. 1981 с. сельхозтехника тэрилтэтигэр көhөн, салгыы улууспутугар Аллараа Бэстээхтэн, Невертан, Беркакиттан о.д.а сирдэртэн элбэх таһаҕаһы таспыт дьоннортон биирдэстэрэ буолар.
Сэбиэскэй кэмҥэ үгүс сыраларын анаан үлэлээбит суоппардарга махтанабыт. Билигин сааhыран олорор дьоммутугар болҕомто ууралларыгар баҕарабын. Биhиги улууспутугар олорор суоппар идэтин баhылаан, араас эриирдээх суолунан айаннаабыт суоппардарга эҕэрдэ буоллун.
Анна Гольдерова