Алтынньы, ахсынньы ыйдарга өрөспүүбүлүкэ бары хаһыаттарыгар, сурунаалларыгар чэпчэтиилээх сурутуу ыытыллыбыта. «Үлэ күүһэ» редакцията чэпчэтиилээх сурутууга актыыбынайдык үлэлэстибит. Улууспут почтатын бары салаалара, нэһилиэнньэ «Үлэ күүһэ» улуус хаһыатын көтүппэккэ ааҕалларыгар, суруталларыгар көдьүүстээх үлэни тэрийдэ.
Ол эрэн сорох нэһилиэктэргэ почта хойутаан тиийэрэ, почта отделениета сабыллыбыта хаһыат суруталларыгар мэһэйдиир. Инникитин бу почта үлэтэ эрэ диэбэккэ нэһилиэк дьаһалталара дьоно-сэргэтэ ааҕар, улуус сонунун билэригэр интэриэстээх буолан, бэйэ-бэйэҕэ көмөлөсүһэн, почтаны кэмигэр тириэрдиигэ күүс-көмө буолалларыгар эрэнэбит.
Чэпчэтиилээх сурутууга «Үлэ күүһэ» хаһыаты ааҕар бастыҥ нэһилиэги талыахпыт. Саамай элбэх сурутааччылаах нэһилиэккэ 2025 с. «Үлэ күүһэ» хаһыакка 4 балаһаны босхо таһаарыахпыт. Ону таһынан редакция өҥөтүгэр сылы мэлдьи 20 % чэпчэтии бэлэхтиэхпит.
Бу да сырыыга улуус, нэһилиэк дьаһалталара, урбаанньыттар, тэрилтэлэр, биирдиилээн дьон элбэх оҕолоох дьиэ кэргэттэргэ, аҕам саастаахтарга, СВО-ҕа сылдьар дьонноох дьиэ кэргэттэригэр хаһыакка сурутууну бэлэхтээн, сыаналаммат өҥөлөрүн киллэристилэр. Холобур туттан Ил Түмэн депутатыгар Василий Николаевка, урбаанньыт Туяра Андрееваҕа, «Темп», «Махтал» маҕаһыын кэлэктииптэригэр ис сүрэхпититтэн махтанабыт. Үлэҕит өрүү тахсыылаах буоларыгар баҕарабыт.
Ону таһынан «Үлэ күүһэ» хаһыакка суруйтарбыт ааҕааччыларбытыгар анаан, розыгрыш тэрийэн ыыттыбыт. Бу розыгрышка олохтоох бородууксуйа, байанай бэлэҕэ оонньонно. Манна урбаанньыт Вячеслав Васильев «Бэйэ дьоно» кафеттан 4000 солк.сертификат, MiniZone-тан үс сертификаты о.д.а бэлэх ууммут спонсордарбытыгар, кэлэктиипкэ махтанабыт.
Күннэй Алексеева