Тохсунньу 15 күнүттэн 21 күнүгэр диэри
Хой
Дьикти соҕус да этии киирдэҕинэ, батына охсума. Барыта да буолбатар, сорох өттө баҕас кэнэҕэһин туһалыан сөп. Айар-тутар баҕаҥ биллэ күүһүрэн ылар чинчилээх, туттумахтаһыаҥ этэ. Тус олоххор соһуччу быһыы-майгы көстүбэт. Ыал дьон, арамаантыка тыыныгар уйдаран, сыһыаҥҥыт биллэ тупсууһу. Оттон, сулумахтар, сиэр таһынан идийээли көрдөөн, кураанаҕы кууһар кутталлааххыт. Тулаҕытын көрүнүҥ. Ырыаҕа ылланарыныы, “уһулуччу үчүгэй киһи диэн суох”.
Оҕус
Үлэ үтүмэнигэр оройгутунан түһэн, сынньалаҥ да көстүүтэ уустук курдук буолуон сөп. Ол эрээри бу күннэргэ саҕалаабыт үлэҕит ситиһиигэ, кыайыыга сирдиирин умнумаҥ. Чуолаан кэпсэтии-ипсэтии, былааны ырытыһыы, ситэрии бэркэ табыллыах курдук. Бэйэ быраабын туруулаһар баҕаны хам баттаамаҥ. Ол оннугар кэлэр нэдиэлэ иккис аҥаарыгар тулаҕытыгар буолар быһыыга-майгыга, бука диэн, кыттыһымаҥ. Иһитиннэриини барытын итэҕэйэн иһимэҥ.
Игирэ
Тулалыыр, чугастык алтыһар дьонуҥ-сэргэҥ санаатын болҕойон истиэҥ этэ. Кинилэр элбэх туһалааҕы этиэхтэрин сөп. Ситиһии төрдө дьыаланы хайдах кэпсэппиттэн, дуогабардаспыттан улахан тутулуктаах. Нэдиэлэ иккис аҥаарыгар болҕомтоҕун уурбакка сылдьыбыт эйгэҕэр күүтүллүбэтэх быһыы-майгы үөскүөн сөп. Бэйэ бодону тардынан, алҕаһы-сыыһаны уһаппакка көннөрө сатаар. Өрөбүллэри дьиэтээҕилэргиниин атаар.
Араак
Тутулуга суох буолар баҕа, омун биллэ күүһүрүөхчэ. Ол үлэҕэ-хамнаска дьайбатын курдук дьаһан. Хамаанданан үлэ ордук таһаарыылаах. Мин аҕай диэн түөһү мөтөтөр, биллэ сатыыр кэм буолбатах. Дьиҥинэн, холку, уу нуурал нэдиэлэ. Айылҕаттан бэриллибит талааҥҥын туһанарга дьулус. Баайга-дуолга, хамсаабат хапытаалга сыһыаннаах боппуруос күөрэйдэҕинэ, эспиэргэ сүбэлэт. Быһымах быһыыланыы – сыыһа!
Хахай
Бэрт бутуурдаах боппуруоһу быһаарыах курдуккун. Ол эрээри гороскоп ол түмүгэ санааҥ иһинэн буоларын мэктиэлээбэт. Элбэҕи ситэрэн-хоторон биэрии ирдэниэ. Курус санаа кууспалаан баран, бэрт сотору сэргэхсийиэҥ. Тус олох чааһа кэминэн. Соҕотох Хахайдар сэргиир киһигит интэриэһин тардар кыаххыт улааппыт. Оттон ыал хахай сыыһа-халты дьаһанан, олоҕун аргыһа күнүүлээн турар кутталлаах.
Кыыс
Сэниэ-күүс толору. Былаанныыры тохтотон, быһаччы дьайыыга ылсарга сөптөөх кэми туттумахтаһыҥ. Хаарыан кэми тус бэйэ дьыалатыгар ыыппаккытыгар сулустар сүбэлииллэр. Нэдиэлэ иккис аҥаарыгар ким доҕор, ким туһанааччы эрэ буоларын быһаарар тоҕоос көстүүһү. Ол – санааргыыр түгэн буолбатах. Төттөрүтүн, эрдэ биллибититтэн үөр, “аһыллыбыт миэстэҕэ” дьиҥ доҕор хайаан да көстүө!
Ыйааһын
Холку быһыыҥ хайҕаныан эрэ сөп, онон бу кэмҥэ быһаарыллыбат дьыала эйиэхэ суоҕун тэҥэ. Аймахтар, биир идэлээхтэр эбэтэр ыалларыҥ икки ардыгар мөккүөр да таҕыстаҕына, холкутук уоскутар кыахтааххын. Нэдиэлэ бүтүүтэ үбү-харчыны кэмчилээ. Оруобуна эрээри сөбүгэр удамыр сыанаҕа булар кыах баарын умнума. Өрөбүлгэ оҕо сылдьан алтыспыт киһигин көрсөн, бэркэ сэргэхсийэр чинчилээххин.
Скорпион
Күн кыһалҕата суох бэртээхэй нэдиэлэ. Ол эрээри интэриэһинэй быһыы-майгы да көстүбэт. Бу – бэйэни тупсарарга, сайыннарарга анаммыт кэм: тас көстүүттэн саҕалаан, толкуйдуур толкуйга тиийэ. Суолталааҕы олоччу кэлэр нэдиэлэҕэ көһөрөр ордук. Тугу эмэ саҥарыаҥ, куолулуоҥ иннинэ үчүгэйдик толкуйдаа. Аны ким эрэ дьиҥ баарынан буолбакка, бэйэтин туһатыгар эргитэн кэпсиэн сөбүн сулустар сэрэтэллэр.
Охчут
Олох сонун, саҥа түһүмэҕэ саҕаланыах курдук. Кимиэхэ эрэ арамаантыкалыы сыһыан саҕаланыан, кимиэхэ эрэ саҥа дьыалабыай партнёр көстүөн сөп. Оттон сорох олоҕун уйгутун оҥостор суолу тобулуо. Ол да буоллар халлааннаан көппөккө, олоҕу баарынан ылыннаххытына, элбэҕи ситиһиэххит. Кэрэ, күүстээх аҥаары кытта сыһыаҥҥа эмиэ саҥалыы сүүрээн киирэригэр тардыһар чинчилээххит.
Чубуку
Былааннаммыты дьиҥ олоххо киллэрэр уолдьаста. Туох ситиэхтээҕин, көнүөхтээҕин толкуйдаа уонна түһүнэн кэбис! Кэпсэтии кэмигэр анараа өрүт суорҕаны бэйэтигэр тарда сатаатаҕына соһуйума. Эн да бөрүөк улахан өлүүскэтэ тиксэригэр дьулуһарыҥ аньыы буолбатах. Интэриэскин көмүскэнэргэр бигэ, олохтоох төрүөтү эрдэттэн толкуйдаа. Чугас доҕоргор тапталгын, иэйииҥ иһирэҕин биллэрэртэн толлума.
Күрүлгэн
Быһыы-майгы барыта эйиэхэ сөптөөх курдук буолан иһиэҕэ. Бэл, туоларыгар ончу эрэммэтэххин да ситиһэр кыахтааххын. Онон дуоһуйан, тохтоон-уостан хаалбакка, салгыы баран ис! Элбэх соругу тэҥинэн толорор усулуобуйаҕа үлэлиир судургута суох. Ол эрээри итинник утум-ситим барар үлэ эрэ кэскиллээҕин кыл да түгэнэ умнума. Өрөбүллэргэ үчүгэйдик сынньан, эт-сиин, өй-санаа күүрбүтэ налыйыах тустаах.
Балыктар
“Сыылба-бытаан да күннэр” диэх курдуккун. Туох эрэ ыйытыыга хоруйу өр күүтэр чинчилээххин. Ол эрээри ити тохтобулу үтүө өттүнэн ылын. Бу кэм эн толкуйдуургар анаммыт. Сыалгын-соруккун сыымайдаа: олус элбэх сиэртибэни эрэйэр түгэнигэр атын суолу тутуспут ордук буолаарай? Чугастык саныыр киһигин кытта сыһыан бөҕөргүө, ол эрээри дьиҥ үтүө сыһыан билигин да ыраах. Тапталлааххын күнүүлэппэт курдук сырыт.
«Кыым» хаһыаттан