Бу күннэргэ куйаар ситиминэн Степан Кустуктаанап тылларыгар, Данил Санников мелодиятыгар биир дойдулаахпыт, норуот тапталлаах ырыаһыта Раиса Захарова ыллаан үйэтиппит «Күндү ийэм барахсан» ырыаны саҥалыы тыыннаан Казахстан эдэр ырыаһыта Нурмухамед Жакып толоруутун дьон-сэргэ олус сэҥээрэ иһиттэ.
Ийэ күнүн көрсө эдэр ырыаһыт Дьокуускайга үс кэнсиэри туруоран, саалаҕа толору көрөөччүнү муста.
Онно Нурмухамед Жарып ырыа ааптарын СӨ культуратын үтүөлээх үлэһитин, самодеятельнай композиторы Данил Санниковы ыҥырда. Кини Суорун Омоллоон аатынан Опера уонна Балет тыйаатырын үрдүк сыанатыгар туран, ааптарга ырыа олус истиҥ иэйиилээҕин, сөбүлээн ылыммытын биллэрдэ. Сыанаҕа ыҥыран махтал тылларын эттэ, сибэкки дьөрбөтүн туттарда.
Саха норуотун кутун тутар, ылбаҕай тыллары ырыа гынан көтүтэр биллэр мелодист Данил Санников биир бастыҥ ырыата дойду таһымыгар ылланан, истээччитэ үксээбититтэн олус үөрэн туран, эдэр ырыаһыкка үрдүк ситиһиилэри баҕарда.
Данил Данилович манна барарыгар массыына биэрэн, күүс-көмө буолбут улуус баһылыгын солбуйааччытыгар Сардаана Стручковаҕа махталын тириэрдэр.
Нина Сутакова.
Хаартыска; «Үлэ күүһэ» вастап бөлөҕүттэн туһанылынна. Ырыаны истэргэ, видеоны көрөргө биһиги телеграм бөлөхпүтүгэр киир: //t.me/silatrudagorny