Оҕуруот аһыттан саҕалаан, кыһыҥҥы, сайыҥҥы сибэкки арааһын үүннэрэн, арассаадалаан нэһилиэнньэҕэ туһалаах өҥөнү оҥорор, дэгиттэр дьарыктаах Екатерина Захарова туһунан сырдатан турабыт. Бу кэмнэргэ тохсунньуга олорпут сиэмэлэрэ быгаталаан, түбүктээх үлэтин үгэнигэр сылдьар. Сир аһыттан ордук дьэдьэни сөбүлээн үүннэрэр. Минньигэс астаах сир аһын, аан бастаан сиэннэригэр күндүлээри олордубут.
«Дьэдьэни олордуунан, аҕыйах сыл бэттэх саҕалаатым. Уопуттаах оҕуруотчуттар сүбэлэрин, маастар кылаастарын туһанабын. Оҕуруот сиэмэлэрин эрдэ почтанан сакаастаан уурунабын. Тохсунньуттан саҕатыттан саҕалаан, ый бүтүөр диэри “Али Баба”, ”Руяна”, “Александрия”, “Барон Солемахер”, “Александрина” уо.д. а суортаах дьэдьэннэри олортум.
Дьэдьэн сиэмэтэ олус бытархай буолар, онон илиппэккэ эрдэ бэлэмнээбит торфалаах таблеткаларга хаар үрдүгэр уурталыыр табыгастаах. Сиэмэни баттаабаккыт, хаара уулуннаҕына бэйэтэ сөптөөх дириҥэр киирэр. Итиэннэ холодильник долбууругар хаһан, хаара ууллуор диэри туруоруллар. Балачча өр турар. Кыра астаах дьэдьэннэр икки нэдиэлэнэн үнүгэстэрэ быгаллар. Хаара уулунна да сырдыкка, сылаас сиргэ таһаарыллар. Күн аайы үрдүнэн бүрүллүбүт лутрасилин арыйан салгылата сылдьыллыахтаах. Кыра үнүгэстэргэ сэрэнэн шприһинэн эбэтэр аптека грушатын көмөтүнэн төгүрүччү уу кутуллар ордук. Үнүгэс оҕунна да турбат, өлөр. Улааталларын саҕана сиик буолан, түһэрин курдук, үрдүлэринэн пульверизаторынан ыстарыллар. Үс-түөрт сэбирдэх таҕыстаҕына ыстакааннарга көһөртүүгүт.
Маны таһынан тохсунньуттан эустома сибэккилэри арассаадалыыбын. Сиэмэтэ эмиэ олус бытархай буолан, дьэдьэни олордуу ньыматын туттабын. Хаппырыыс сибэкки буолан, көрүүгэ-истиигэ наадыйар. Олунньу ортотуттан саҕалаан үс уонна үс аҥаар ыйынан ситэн сибэккилээччилэри арассаадалааһын саҕаланар. Холобур лобелия, шалфей, маргаритка уо.д.а. сибэккилэри олордор былааннаахпын ”, – Екатерина Захарова санаатын үллэстэр.
Бу ыйдартан саҕалаан оҕуруотчуттар сахабыт сиригэр сөп түбэһэр тулуйумтуо сиэмэлэри арассаадалыыр, көрөр-истэр түбүктээх кэмнэрэ саҕаланар. Билиҥҥи кэмҥэ хас биирдиибит эбии дохуоттаннар эбэтэр эбии ас-үөл булунар суолу тобулан хамсанара табыгастааҕын ааһан, олус туһалааҕын бэлиэтиэҕиҥ.
Нина Сутакова