Бэс ыйын 18 күнэ – Саха сирин олохтоохторугар үйэлэргэ умнуллубат, историяҕа хаалар ураты күнүнэн буолла. Ол курдук, Дойдубут Бэрэсидьиэнэ Владимир Путин кэлэн, өрөспүүбүлүкэбит салалтатын, олохтоохторун кытары көрүстэ.
Владимир Владимирович Саха сирин үлэһит, айар дьоҕурдаах дьонун мэлдьи бэлиэтиир, ол иһин бастатан туран «Үлэ кыбаарталыгар», өрөспүүбүлүкэбит креативнай индустриятын кытта билистэ, «Моя профессия-ИТ», доруобуйа харыстабылыгар туһуланар «Сайберия», «Лаборатория ИИ» бырайыактары, «Тундра» анимационнай студия үлэтин, Бэрэсидьиэн быһаччы дьаһалынан үлэлиир киинэ устар киин, СВО-ҕа анаан айыллыбыт араас оборудованиены, техниканы, «Сулус» стрелковай киин үлэтин көрдө.
Уһук Илиҥҥэ оҥоһуллар БПЛА араас көрүҥнэрин, FPV-дроннары уонна бронежилеттары, тепловизорнай тэриллэри, буржуйка-оһохтору, рациялары о.д.а. көрдө, сэҥээрдэ.
Салгыы Ил Дархан Айсен Николаев Саха сирин агломерациятын маастар-былаанын сиһилии сырдатта. Бу былаан биир сүрүн соругунан хаарбах дьиэлэр көтүрүллүбүт территорияларын ыраастааһын буолар. Бу сылга былааннаммыт дьиэ барыта көтүрүллэн, ыраастанан олохтоохтору саҥа таас дьиэлэргэ көһөрүү бырагыраамата былаан быһыытынан түмүктэниэхтээҕин иһитиннэрдэ. Санатар буоллахха, бу бырагырааманан кэнники 10 сылга 11 тыһ. киһи саҥа дьиэҕэ көстө. Кэлэр сылтан 2030 с. диэри саҥа былаан ылыллан Саха сирин үрдүнэн хаарбах туруктаах дьиэҕэ олорор киһи суох буолуохтаах.
Саҥа олоххо киирбит «Кадр» национальнай бырайыак чэрчитинэн ыытыллыбыт көрсүһүүгэ Владимир Путин Уһук Илиҥҥи региоҥҥа «Муравьев-Амурский 2030», «Земский учитель», «Земский доктор» үлэлии кэлбит исписэлиистэри кытары көрүстэ, кинилэр санааларын иһиттэ, ыйытыыларыгар хоруйдаата. Көрсүһүү түмүгэр бэрэсидьиэн Уһук Илиҥҥи региоҥҥа үлэлии кэлбит хас биирдии исписэлиискэ махталын эттэ, эһиги энтузиазмҥыт, билиигит, уопуккут дойдубут инникитэ бигэ туруктаах, күүстээх буоларыгар төһүү күүс буолуоҕа диэтэ.
В.А.Босиков аатынан Музыка Үрдүкү оскуолатыгар сылдьан 2440 оҕо үөрэнэр кыахтаах кампус, 150 миэстэлээх интернат тутуутун бырайыагын билистэ. Кампус тутуута эмиэ дойдубут бэрэсидьиэнин быһаччы өйөбүлүнэн ыытыллар. Тутуу үлэтэ номнуо саҕаламмыт. Оҕолор уонна учууталлар күүтүүлээх ыалдьыты долгуйа көрсүбүттэр. Бу түгэн хас биирдии үөрэнээччигэ үйэлэргэ умнуллубат түгэнинэн буолбут. Оҕолор эрдэ бэлэмнээбит Владимир Путин мэтириэтин хартыынатын бэйэлэрэ ис дууһаларыттан уруһуйдаан, суруйан өйдөбүнньүк гына бэлэх ууммуттар.
Бу курдук, бэс ыйын 18 күнэ – Владимир Путин Саха сиригэр кэлэн барыыта биир улахан сабыытыйанан буолла. Төһө даҕаны дойдубут үрдүнэн уустук балаһыанньа буоллар, бэрэсидьиэн анаан-минээн кэлбитэ биһиги өрөспүүбүлүкэбитигэр улахан суолталаах.
Онон Сахабыт сирэ инникитин даҕаны дойдубут сайдыытын кытта биир тэтимнэхтик үүнэ-сайда турдун!
Күннэй Алексеева