Бүгүн Дьокуускайга саха народнай поэта Савва Тарасов үбүлүөйдээх 90 сылын түмүктүүр тэрээһиннэр ыытылла тураллар. Тэрээһин чэрчитинэн улуус баһылыга Никита Андреев М.К.Аммосов аатынан Хотугулуу-Илиҥҥи федеральнай университекка улуус устудьуоннарын кытта көрүстэ.
Үөрүүлээх көрсүһүүгэ Бүтүн Арассыыйатааҕы уопсастыбаннай «Эдэр Гвардия» хамсааһын Саха сиринээҕи салаатын салайааччытын солбуйааччытыгар, ХИФУ устудьуонугар Константин Колесовка улуус дьаһалтатын Бочуотунай Грамотатын туттарда.
Улуус экономическэй сайдыытын управлениетын начаалынньыга Сахая Филиппова Горнай улууһун сайдыытын стратегиятын сиһилии билиһиннэрдэ. Улуустааҕы үөрэх управлениетын методическай үлэҕэ начаалынньыгы солбуйааччы Александр Кузьмин 2025 с. муниципальнай бырайыагынан ыытыллыахтаах «Кадровай политика» бырагыраама туһунан кэпсээтэ. Одуну нэһилиэгин баһылыга Владимир Текеянов «Микрополис» диэн бырайыакка тохтоото.
Истиҥ көрсүһүүгэ устудьуоннар актыыбынай кыттыыны ыллылар, санааларын үллэһиннилэр.
Бу күн Горнай улууһун устудьуоннарын түмэр «Чыпчаал» түмсүү лидерын куоластаатылар. Ол курдук М.К.Аммосов аатынан ХИФУ устудьуона Константин Колесов талылынна.
Улуус ыччаттара төрөөбүт сирдэригэр кэлэн табыгастаах усулуобуйаҕа үлэлииллэригэр, олохсуйан олороллоругар туһаайыллыбыт хамсааһыннар олоххо киирэллэригэр бары түмсүүлээх буолуоҕуҥ.
Нина Сутакова