Горнайга дьон олорор усулуобуйатын тупсарарга туһаайыллыбыт “Хаарбах туруктаах дьиэлэртэн” федеральнай бырагырааманан үгүс үлэ барда. Аҥаардас 2023 с. Бэрдьигэстээххэ элбэх кыбартыыралаах аҕыс, Кэптиҥҥэ биир дьиэ бэйэтин олохтоохторун көрүстэ.
“Томтор” ХЭТ биһиги улууска үлэлэспитэ хаһыс да сыла. 2021 с. Манчаары оонньууларыгар ыыппыт үлэтин таһынан, ахсынньы бүтэһик күннэригэр “Сэргэлээх” түөлбэтигэр 42 кыбартыыралаах дьиэни туттарда. Салайааччыта Петр Архипов 2023 с. түмүгүнэн, Горнайга “Тутуу комплексын бастыҥ үлэһитэ” анал номинацияны ылар чиэстэммитэ.
Бэрдьигэстээххэ Софрон Данилов аатынан уулуссаҕа дьэндэйбит саҥа дьиэ олохтоохторуттан биирдэстэринэн Елизавета, Иван Слепцовтар буолаллар. Кинилэр хас эмэ сыл устата эргэ уопсай дьиэлэргэ олорон кэлбиттэрэ.
– Күүтүүлээх дьиэбит күлүүһүн ааспыт сыл ахсынньы 26 күнүгэр тутаммыт, үөрэ-көтө сылдьабыт. Икки хостоох кыбартыыраҕа киирдибит. Бэйэбитигэр сөрү-сөп. Сылаас, сырдык, ыраас, итии-тымныы уу баар. Иккиэн хойукка диэри үлэлиир буоламмыт, киэһэттэн киэһээ оргууй оҥосто сылдьабыт. Малбытын-салбытын дьэ таҥан, туруоран эрэбит. Үүммүт 2024 с. урууларбытын, доҕотторбутун ыҥыраммыт, Саҥа сылы – саҥа дьиэҕэ көрүстүбүт, – диэн Иван санаатын этэр.
Саҥа дьиэ күлүүһүн туппут дьон санаалара ситэн сылдьар. Билигин бары даҕаны дьиэ-уот оҥостуутугар түбүгүрэллэр. РФ Президенэ Владимир Путин бу маннык федеральнай бырагырааманы олоххо киллэрбитэ, нэһилиэнньэ олоҕо тупсарыгар мөккүөр суох.
Вячеслав Алексеев