Красноярскайга хотугу многоборье көрүҥэр улахан дьоҥҥо уонна эдэрдэргэ Россия чемпионата буолла. Дойду 13 регионун бастыҥ спортсменнара күөн көрүстүлэр.
Саха сирин хамаандата олус тыҥааһыннаах киирсиигэ икки бөлөххө иккиэннэригэр бастакы миэстэни ылан, чаҕылхай ситиһиилэннэ.
Өрөспүүбүлүкэ сүүмэрдэммит хамаандатын састаабыгар Горнайтан Лука Харитонов аатынан оскуола XI кылааһын үөрэнээччитэ Алгыс Михайлов бары көрүҥнэргэ олус бэркэ кыттан, хамаанда инники күөҥҥэ тахсарыгар быһаарыылаах очукуолары биэрдэ.
Эдэр кэскиллээх уолбут спордунан утумнаахтык дьарыктанар. Кини дуобакка спорт маастарыгар кандидат оҕолорго Россия чемпиона, Аан дойду, Европа хас да төгүллээх призера. Алгыска, тренеригэр Иван Гороховка улахан ситиһиилэринэн эҕэрдэбитин тириэрдэбит. Инникитин да дойдутун аатын ааттата туруохтара диэн эрэнэбит.Вячеслав Алексеев