Казахстаҥҥа ыытыллыбыт Көс омуктар оонньууларын түмүктэммитин кэнниттэн Асык ату (мохсуо курдук) уонна Бес асык (хаамыскаҕа майгынныыр) диэн көрүҥнэргэ Аан дойду I чемпионата тэрилиннэ.
Манна Саха сирин спортсменнарыттан турар Россия хамаандата уопсай түмүккэ үһүс буолары ситистэ.
Хамаанда састаабыгар хотугу өбүгэ оонньууларыгар өрөспүүбүлүкэ чемпиона Данил Колесов төрүт оонньууларга маастар-кылаас көрдөрдө. Кини туттар тиэхиньикэтин бары сэҥээрэ көрдүлэр. Атын дойду спортсменнара биир ураты ньымалаах эбиккин диэн кэлэн илии тутустулар, хаартыскаҕа түһэн бэйэлэрин дьонноругар көрдөрүөх, кэпсиэх-ипсиэх буоллулар.
Данил Колесов Лука Харитонов аатынан орто оскуолаҕа 5 кылаастан Айталина Колодезникова салалтатынан өбүгэ оонньууларыгар үөрэтиллэн-такайыллан үүнэн тахсан, улахан түһүлгэҕэ бэйэтин көрдөрбүтүттэн үөрэбит. Эдэр спортсмеммытыгар инникитин ситиһиилэри баҕарабыт.
Вячеслав Алексеев