Одунулар киэн туттар эдэр фермербыт Игорь Прокопьев олохтоохтук дьаһанан үлэлээбитэ номнуо ахсыс сылыгар барда. Быйыл 2024 с. 4 гаа сиргэ хортуоппуй уонна 1 гаа-ҕа – оҕуруот аһа ыһыллыбыта.
Инники сылларга кини аҕыс-тоҕус гаа сиргэ хортуоппуй, 2 гаа-ҕа оҕуруот аһа олордор буоллаҕына, айылҕа уларыйыытынан бааһыналарын үрэхтэрэ уоланнар, сирин лаппа аччатта. Игорь билэрбит курдук, бу аҕыс сыл тухары нэһилиэк оҕо уһуйаанын, кафелары, улуус олохтоохторун хортуоппуйунан оҕуруот аһын хааччыйан олорор.
Быйыл сайын курааран, үүнүү мөлтөх. Игорь төрөппүттэрин кытта 50-чаа ынах сүөһүнү ииттэн олороллор, эт туттаран, эбии дохуот киллэринэллэр. Кини быйылгыттан оҕуруот аһын тохтотон, сүөһүлэрин элбэтэр былааннаахтарын биллэрдэ. Эһиилгэттэн саҥа хотон туттан, элбэх сүөһүгэ эбии аһылык бэлэмнээн, күрүө-хаһаа туттар былааннаах.
Игорь Прокопьев балаҕан ыйын 21 күнүгэр “Үүнүү – 2024” улуустааҕы дьаарбаҥкаҕа хортуоппуй, оҕуруот аһын атыылыаҕа. Ону тэҥэ биир эдэр фермербыт Иза Афанасьева сибиэһэй тыһаҕас этин атыылыы кэлиэҕэ. Бэрдьигэстээх нэһилиэгин дьоно-сэргэтэ кэлэн, сибиэһэй бородууксуйата атыылаһаарыҥ диэн ыҥырабыт.
Алена ВАСИЛЬЕВА