Педагог, туризм эйгэтин идэлэрин толору баһылаабыт Кытайга, үөрэммит, үлэлээбит, йоганан утумнаахтык дьарыгырбыт, Таилаҥҥа, Кореяҕа олоро сылдьыбыт сахалыы ааттаах тренери, учууталы Омолло Слепцованы кытта билсиһиибитин сырдатабыт.
Үөһээ Бүлүү Боотулуутуттан төрүттээх Омолло Слепцова тохсунньу ыйтан С.Г.Ковров аатынан Күөрэлээх орто оскуолатыгар саха тылын уонна литературатын учууталынан ананан үлэлии сылдьар.
Кэлээт да үлэтин таһынан нэһилиэнньэ олохтоохторугар йога бөлөҕүн тэрийэн, тапталлаах дьарыгын саҕалаабыт.
Сахалыы уус-уран тыллаах-өстөөх, олус интэриэһинэй, сэргэх сэһэргэһээччи буолан биэрдэ:
– 2014 с. Кытайга үөрэнэ сылдьан, йога диэн олус умсугутуулаах дьарыгы кытта аан бастакыбын билсибитим. Кытай университетыгар туроператор уонна турагент идэлэрин, ону кытта ХИФУ-га туризм уонна ыалдьыттатыы идэлэрин баһылаабытым.
2017 с. доруобуйабар улахан эчэйиини ылан, уустук тургутууну ааспытым. Медицинэ да тутатына эмтии охсубат туругун бу йога хамсаныыларын туттаммын, туһанаммын атахпар турбутум. Онон бу дьарыкпын өссө чугастык билээри, билсээри 2018 с. йога дириҥ кистэлэҥнэригэр эбии үөрэммитим.
2019 с.Кытайга пандемия туран, Сахам сиригэр төннөн кэлбитим. Санаам сытар дьарыгын дириҥник билээри Дьокуускайга «Школа учителей» диэн биллэр йога тренэригэр Ольга Агаринаҕа эбии үөрэммитим.
Онтон тирэх, күүс ылынан 2020 с. перинатальнай уонна дьахтар йогатын тренеринэн тохтоло суох үлэлээн кэллим.
Ол эбэтэр дьахтар доруобуйатыгар дьарыктары ыытабын, араас тэрээһиннэргэ тыл этэбин, бэйэм туспа блогтаахпын. Маны кытта тэҥҥэ ийэ эбээһинэһин толорор, «Оҕо төрөөбүтүн кэннэ, дьахтар этин-сиинин чөлүгэр түһэрии» уонна «Тааһын уҥуоҕун, быччыҥын доруобуйата» диэн кууруһу куйаар ситиминэн тэрийэн, үлэлэтэн кэллим», – диэн санаатын үллэһиннэ.
Омолло Афанасьевна Слепцова «Араас улахан дойдуларынан киэҥ сирдэринэн сылдьар киһи бэйэтин омугунан өссө үрдүктүк киэн туттар буолар» диэн этэр.
Киһи аата улахан суолталааҕын үрдүктүк тутар. Эн хантан хааннааҕыҥ, кимтэн силистээҕиҥ аан бастаан аатыҥ кэпсиэхтээх диэн чиҥник билинэр.
Омолло бэйэтин көҥүл дууһалаах киһибин дэнэр. Өбүгэ төрүт тыынын иҥэринэн, иэйэн-куойан туран, уу сахалыы сайа саҥаран бардаҕына ураты чуумпуга, дьиктигэ куустарарга дылыгын.
Ханна да сырыттар төрөөбүт сирин-уотун, баай култууратын, тылын-өһүн тарҕата сылдьар эдэр учуутал буолар.
Нина Сутакова