Саҥа үйэҕэ эргиэн үлэтигэр саҥа саҕалааһыннар кэрэхсэбиллээхтэр. Урукку кэмҥэ атыы-кутуу эргиэн эйгэтигэр “Холбос” биир тэрилтэтэ барытын хааччыйан олорбута. 1990 с. ыһыллыы кэмигэр, нэһилиэкпит эдэр ыччата муммакка-тэммэккэ саҥа сүүрээн, урбаан үлэтин ылсан үлэлии сылдьаллара хайҕабыллаах, махталлаах.
Оннук урбаан үлэтин ылсан, Атамай нэһилиэгин элбэх оҕолоох Юлия, Дмитрий Филипповтар таһаарыылаахтык үлэлии сылдьаллар. Кинилэр атыылара тыа дьонун наадыйалларын толорууга улахан болҕомтону уураллар. Маҕаһыыннарыгар бородуукта араас көрүҥэ баар буоларын хааччыйаллар.
Филипповтар дьиэ кэргэттэрэ 2012 с. ыам ыйыттан урбаан үлэтигэр киэҥник, таһаарыылаахтык үлэлээн саҕалаабыттара. Урбаан үлэтэ аһынан-үөлүнэн, табаар арааһын атыыта, билиҥҥи ирдэбилинэн, саҥалыы өйүнэн-санаанан салайтаран үлэлиэн-хамсыах, дьоҥҥо оҥоруох диэтэххэ уустуктардаах буолара биллэр. Кинилэр бэйэлэрин үптэринэн дьоҕус бэкээринэни 2017 с. үлэҕэ киллэрэн, олохтоохтору килиэбинэн, ону таһынан бурдук ас арааһын астаан, нэһилиэк дьонун күннэтэ хааччыйаллар.
Биир сиргэ туран хаалбакка, үлэлэри кэҥэтэн, салгыы сайыннаран, “Ыраас уу” үлэтин 2021 с. алтынньы ыйыттан чэбдик, ыраас уунан хааччыйан, бар дьон махталын ылыахтарын ылаллар. Эдэр дьон үлэни-хамнаһы сөптөөхтүк аттаран туруоран, онно дьүөрэлээн тэринэн, суолу-ииһи тобулан сайдыыны киллэрэллэр. Ол курдук, бэйэлэрин күүстэрин, 2023 с. “Астык” диэн ааттаах саҥа маҕаһыын туттан, үлэҕэ киллэрдилэр. Дьиэ кэргэн үлэтэ өссө элбээн, түбүгэ элбэҕэ биллэр. Оҕолорун кыра саастарыттан бэйэлэрин кытта батыһыннара сылдьан, үлэ сатабылыгар үөрэтэллэр.
Эдэр дьон бөһүөлэктэн тэйиччи 1,5 көс сытар Тумааскай диэн өтөх сиргэ сыспай сиэллээх сылгыны ииттэллэр. Ол өтөхтөрүнэн бары түмсэн оҕолорунаан, аймахтарынаан кылгас сайыҥҥы кэмҥэ кыстыыр отторун охсон, кээһэн бүтэрэллэр. Ону тэҥэ бириэмэ аттаран, бары айылҕаҕа сылдьалларын туохтааҕар да ордороллор, сир аһын ботуччу хомуйан, хаһааналлар.
Дьэ, ити курдук Юлия, Дмитрий эдэр ыал бэйэлэрин ылсыспыт урбаан эйгэтин үлэтин, бэйэ хаһаайыстыбатын оҥостон, биллэ-көстө ситиһиилэннилэр. Ыарахантан толлон турбакка, нэһилиэкпит эдэр ыччат дьоно, нэһилиэкпит олоҕун уйгутун үрдэтиэхтэрэ, олохпут таһыма үрдүө, тупсуо диэн бигэ эрэллээхпит.
Валентина Яковлева.