Улуус дьаһалтатын делегацията СВО-ҕа сылдьар уолаттарбытын кытары көрсөн, кэпсэтэн, санааларын истэн кэллэ. Ыраах айаннарыгар Дьокуускайынан, Москубанан, Ростовунан уонна миэстэтигэр элбэх киһини кытары алтыстылар. Бары дойдубут туһа диэн сылдьар буоланнар, бэйэ-бэйэлэрин өйөһө, сүбэ-ама бэрсэ сылдьалларын кэпсээтилэр. Үгүс дьон ортотугар биир дойдулаахтарбыт кытары бааллар. Биһиги дьоммут ДНРга опорнай пууҥҥа Горнайтан сылдьар Арзу Керимованы көрсөн, сүбэ-ама ылбыттарын астына сырдаттылар.
Бэрдьигэстээххэ төрөөбүт, 2005 с Сэмэн Данилов аатынан оскуола выпускницата, СӨ үп министиэристибэтигэр үлэлиир. Алтынньыттан тустаах министиэристибэ аатыттан командировкаҕа сылдьар. Кинилэр ДНР чөлүгэр түһэриигэ, барар-кэлэр дьоҥҥо Саха сирин аатыттан күүс-көмө буола сылдьаллар.
«Биһиэхэ бараҕыт дуо, диэн ыйыппыттарыгар, уһуну-киэҥи толкуйдуу барбакка, «надо так надо» диэт тутатына сөбүлэспитим. Улаханнык куттаммаппын. Саха сириттэн сылдьар дьоҥҥо эрэ буолбакка, барыларыгар көмөлөһө сатыыбыт. Арзу — мечта диэн суолталаах. Аҕам ааттабыта. Төрөппүттэрбэр, учууталларбар, бииргэ үөрэммит оҕолорбор эҕэрдэбин ыытабын. Горнай олохтоохторун барыларын кэлэн иһэр Саҥа дьылынан эҕэрдэлиибин, дьоллоох буолуҥ» , — диэн Арзу кылгастык кэпсиир.
Эйэлээх олох туһугар бэйэтин кылаатын киллэрсэ сылдьар биир дойдулаахпытынан киэн туттабыт махтанабыт. Ойуурдаах куобах охтубат, дьонноох киһи тутайбат диэн мээнэҕэ эппэттэр.
Вячеслав Алексеев