Олохпут сайдыытын араас сылларын кытта тэҥҥэ хардыылаан, үлэни өрө туппут, чэрдээх илиилэринэн элбэх көлөһүннэрин тоҕон, ааспыт кэмнэргэ дойдубут сайдыытын түстэспит дьоннорбутун уонна кинилэри утум салгыыр көлүөнэ дьоннорун, өрөспүүбүлүкэҕэ Үлэ сыла буоларынан ахтан-санаан ааһарбыт тоһоҕостоох. Биир тэрилтэҕэ үйэ аҥаара үлэлээбит, Мытаахтааҕы үүтү астыыр сыах маастара, СӨ тыатын хаһаайыстыбатын туйгуна, үлэ бэтэрээнэ Татьяна Карпова туһунан сырдатыам. Татьяна киинэ түспүт, оҕо саастара, оскуолатааҕы сыллара Хаҥалас улууһугар элэҥнээн ааспыттара, Өктөмнөөҕү үүтү астыыр тэрилтэҕэ лаборанынан үлэлии киирэр, идэтин сөбүлээн, онтон кэлин Дьокуускайдааҕы үүтү астыыр маастар-лабораннары бэлэмниир анал үөрэх кыһатын бүтэрэн, 50 сыл бу идэҕэ билиитин, өйүн-санаатын, кыһамньытын ууран кэллэ.
50 сыл эттэххэ да дөбөҥ. Татьяна үлэлээн ааспыт кэмнэрин санаан аастаҕына, үгүс үчүгэй сатабыллаах салайааччылары, үлэһиттэри кытта алтыһан ааспыт эбит. Кинилэр кини инники олоҕор, үлэтигэр элбэх өйөбүллэри, сүбэлэри биэрэннэр, олук уурбуттар эбит диэн үтүө тылынан ахтар.
Татьяна Егоровна үрүҥ аһы дэлэтиигэ сүҥкэн кылаатын киллэрсэр. Ол курдук, сэбиэскэй кэм сылларыгар сопхуос тигинэччи үлэлии турар кэмнэрэ буолан, үүт үрүлэччи ыанара, сайыҥҥы ыйдарга күҥҥэ биэс тн тахса үүт сайылыктарыттан аҕалыллан эриллэрэ, астанара. Онон сарсыарда эрдэттэн киэһэ хойукка диэри үлэлииллэрэ, үлэлэр үксүн илиинэн толоруллаллара. Онон үлэлииргэ ыарахан этэ. Ол эрэн ыарахантан чаҕыйбат үлэһиттэр тигинэччи үлэлээннэр элбэх тонна арыыны, сүөгэйи оҥороллоро, нэһилиэнньэни үрүҥ аһынан хото хааччыйаллара.
Татьяна Егоровна элэ-была тылларын салалтаҕа тириэрдэн, билиҥҥэ диэри үлэлии туралларыгар үтүөлээх.
Татьяна Егоровна дьоҕус киһилээх тэрилтэ тутаах салайааччыта. Онон үүт ас бородууксуйалары дэлэтиигэ оҥорууга эппиэтинэһи сүгэр. Үксүн 35 %-аах сүөгэйи, ону таһынан быыстатан олохтоох нэһилиэнньэҕэ арыыны, суораты оҥорон таһаараллар.
Татьяна Егоровна үлэлээбит үбүлүөйдээх сылыгар аныгылыы тииптээх, үлэлииргэ табыгастаах дьиэ үлэҕэ киирбитинэн үөрэн туран, кэлэктиип өссө таһаарыылаахтык үлэлииригэр бигэ эрэллээх.
Николай Осипов,
РФ Суруналыыстарын сойууһун чилиэнэ.