Биһиги эмиэ, урукку оҕолор курдук, күн кылгаан турар кэмигэр, күһүҥҥү хараҥаларга, борук-сорук буолуута түмсэ түһэн арааһы кэпсэтэрбит. Ордук олоххо дьиҥнээх буолбут түбэлтэлэри кэпсэтэрбитин сөбүлүүрбүт. Сорох-сороҕо аһара кутталлааҕа. Ол кэнниттэн дьиэҕэр соҕотох барыаххын да баҕарбат турукка киирэриҥ. Бэйэ-бэйэбитин төттөрү-таары атаарсан, дьиэҕэ хойутаан тиийэн, сарсыныгар өл мөҕүллүүтэ буолара. Ити түбэлтэлэртэн өйдөөн хаалбыппын ааҕааччыларга билиһиннэриэм.
Мытаах сиригэр-уотугар буолбут түбэлтэ. 50-60-с сылларга, саас түөрт эр бэрдэ кустуу тахсыбыт. Бу күн бултуйбакка өргө диэри күөллэри, үрэхтэри кэрийэ сатаабыттар. Ол сылдьан арааһы барытын кэпсэппиттэр. Итэҕэйбэккэ мөккүһэн да ылбыттар. Киэһэлик, халлаан хараҥарыыта, биир иччитэх өтөххө киирэн, эмиэ күө-дьаа кэпсэтэ-кэпсэтэ аһыы олорбуттар. Ол олордохторуна, доҕоор, хантан баар буолбута биллибэт арбайбыт баттахтаах дьахтар илиитин саратан баран, кинилэри көрдө-көрбөтүнэн, бу түһэн эрэр. Ону көрөөт булчуттар хаһыытыы түһээт, ким аанынан, ким түннүгүнэн ойбуттар, сырсыбыттар. Арай биир киһилэрэ олорон хаалбыт. Бу олорон көрдөҕүнэ, били дьахтардара чаас-чааһынан ыһыллан симэлийэн хаалбыт.
Инники манныкка хаһан да түбэспэтэх дьон түргэн үлүгэрдик хомуна охсон дьиэлээбиттэр. Кэлин ити түбэлтэни истэн куораттан чинчийэр бөлөх тахсан бэрэбиэркэ оҥорбут. Онно биллибитинэн, урут ити өтөххө кыыс өлбүт, уонна кыайан хараллыбакка үөр буола сылдьыбыт. Туох барыта сиэрдээх-туомнаах буолар дииллэрэ чахчы.
Надежда.
«Үлэ күүһэ» хаһыат 2000 сс архыыбыттан
Елена Дьячковская уруһуйа