Дьокуускайга Улуу Кыайыы 80 сылын көрсө, буулдьанан ытыыга Сэбиэскэй Сойуус Геройа Федор Попов сырдык аатыгар өрөспүүбүлүкэтээҕи күрэхтэһии буолла.
Горнайтан Бэрдьигэстээххэ Олимпийскай эрэллэри бэлэмниир өрөспүүбүлүкэтээҕи оҕо спортивнай оскуолатын тренерэ, иитиллээччилэрэ ситиһиилээхтик кытыннылар. Ол курдук, бэстилиэт көрүҥэр Герасим Дьяконов кыайыылаах үрдүк аатын ылла. Бу көрүҥҥэ Арина Старостина (тренер Герасим Дьяконов) чаҕылхай көрдөрүүтүн бэлиэтиэҕи баҕарыллар. Кини өрөспүүбүлүкэ киэн туттар спортсменнарын кытары тэҥҥэ киирсэн, иккис миэстэни ылла.
Бастакы-үһүс миэстэлэри Россия спордун үтүөлээх маастара Евдокия Каторгина уонна РФ спордун маастара Мария Егорова үллэһиннилэр. Бинтиэпкэнэн ытыыга Борис Федоров (тренер Сергей Алексеев) үһүс миэстэҕэ тахсан, иннигэр улахан хардыыны оҥордо.
Вячеслав Алексеев