Бүгүн Бэрдьигэстээххэ нэһилиэктэр икки ардыларынааҕы комплекснай спартакиада чэрчитинэн гиирэ спордугар күрэхтэһии буолла. Урукку сыллардааҕар, быйыл хаһааҥҥытааҕар да элбэх киһи кытынна (112 кыттааччы).
Ыалдьааччылар да аҕыйаҕа суохтара соһутта. Оҕолор, ыччаттар, бэтээрээннэр бэрт тыҥааһыннаах киирсиилэри, кыайыыга дьулуурдарын көрдөрдүлэр. Күрэхтэһии гиирэ спордун быраабылатынан барда.
Өрөспүүбүлүкэ биир бастыҥ спортсмена, биир дойдулаахпыт Владимир Оленов, спорт бу көрүҥүнэн утумнаан дьарыктанааччы уолаттарбыт Иоганн Михайлов, Виталий Ефимов нэһилиэктэрин аатын көмүскээбиттэрэ кэрэхсэбиллээх. Кинилэр күрэхтэһии кыттыылаахтарыгар маастар-кылаас биэрдилэр. Быраабылатын быһаардылар. Хайдах өрө анньар ньыманы көрдөрдүлэр. Биирдиилээн спортсменнарга сүбэ-ама биэрэн, күүстээх өйөбүл буолбуттарын бэлиэтиэх тустаахпыт.
Уопсай түмүккэ бастакы миэстэни Мытаах, иккиһи Бэрдьигэстээх, үсүһү Маалтааны ылан, наадалаах очукуолары суруннулар.
Вячеслав Алексеев