Олунньу 14 күнэ Одуну нэһилиэгэр биир умнуллубат бэлиэ түгэнинэн буолла. Ол курдук, Тапталлаахтар Аан дойдутааҕы күннэрин көрсө үс саҥа төрөөбүт кырачаан бастакы туоһу докумуонун тутта. Бу саҥа сылга 5 оҕо күн сирин көрөн, үөрүүнү, дьолу бэлэхтээтэ.
Бэлиэ түгэнинэн, нэһилиэкпит аҕа баһылыга Владимир Текеянов кырачаан оҕолор төрөппүттэрин эҕэрдэлээн туран, эҕэрдэ суруктары кытта сибэкки дьөрбөтүн, харысхал туттартаата. Нэһилиэкпит баһылыгын солбуйааччы Василий Кривошапкин улуустааҕы социальнай политика управлениетын аатыттан өрөспүүбүлүкэ аан бастакынан күн сирин көрбүт оҕо төрөппүттэригэр, Одуну нэһилиэгин эдэр ыалыгар Куннэй, Дьулустан Аржаковтарга эҕэрдэ суругу бэлэх уунна.
Кырачааннарбыт бары олус ураты ааттаахтар: Хаарчаана, Кыыдаана, Кэрэчээнэ, Туналыына, уонна Тимур.
Бу курдук, нэһилиэкпитигэр саҥа сыл бэлэҕэ, үөрүүтэ үксүү турдун.
Анна Горохова,
Одуну нэһилиэгин ГТАС-ка исписэлииһэ