Дьокуускайга «Муус устар» өрөспүүбүлүкэтээҕи бэстибээл талааннаах, саҥа идеялаах, айар дьоҕурдаах ыччаттары түмтэ.Бу бэстибээлгэ уопсайа икки тыһыынчаттан тахса киһи кытынна. Ыччаттар араас семинардарга, лекцияларга сылдьан, бырайыак көмүскээн, бэйэлэригэр саҥаны арыйдылар.
Триумф уораҕайыгар «Муус устар» өрөспүүбүлүкэтээҕи бэстибээл үөрүүлээх чааһа ыытылынна. Тэрээһини Ил Дархан Айсен Николаев арыйда. Айсен Николаев өрөспүүбүлүкэ инники кэскилэ ыччаттартан тутулуктааҕын, кинилэр үлэлээн-хамсааан, айан-тутан Саха сирин, Россияны сайыннарыахтара диэн ыччаттарга эрэнэрин биллэрдэ.
Бу күн Россия уонна Саха сирин аатырбыт ырыаһыттара ыллаатылар, үҥкүүһүттэр, Цирка артыыстара музыкальнай нүөмэрдэри көрдөрдүлэр. Эдэр талааннаах дизайнер-модельердар үлэлэрэ үгүс болҕомтону тарта.
Ил Дархан Айсен Николаев «Муус устарга» кыайыылааҕынан Горнай улууһун ааттаан, 2 мөл. суумалаах сертификаты Горнай улууһун баһылыгар Никита Андреевка ытыс дохсун тыаһынан туттарда.
Биһиги улууспутуттан 70-ча ыччат көхтөөхтүк кыттан, улууспут аатын дорҕоонноохтук ааттатта. Ол курдук, Анастасия Сергеева «Айар» медиаоскуолаҕа I миэстэ, Альберт Аввакумов «Бастыҥ оратор» номинация, Солоҕон хамаандата «Мин ыра санаам хамаандата» дьыалабыай оонньууга III, эдэр учууталлар хамаандалара Бастакы Президент М.Е.Николаевка аналлаах «Үүнэр көлүөнэ педагога» дьыалабыай оонньууга II, Саргылана уонна Айтал Никаноровтар «Дьоллоох дьиэ кэргэн-дьоллоох өрөспүүбүлүкэ» хаартысканан куоҥкуруска «Бары дьиэ кэргэнинэн» номинацияҕа II, онтон Любомила, Александр Макеевтар уопсай түмүккэ I, Татьяна Павлова «Саха сирин доброволеһа» региональнай бириэмийэҕэ «Социальнай бырайыак» номинацияҕа I, Василий Кривошапкин финалист буоллулар. Кирилл Платонов «Алаһа дьиэ» култуурунай биридимиэтин өйдөбүлүн биэрии номинацияҕа кыайыылаах, Күндүүнэ Колесова «Туризм эйгэтигэр бастыҥ сувенир» номинацияҕа «Айар кинигэ кыһатын», Александр Николаев керамистар сойуустарыттан, Анджела Иванова «Көмүлүөк» хампаанньаттан анал бириистэринэн наҕараадаланнылар.
«Муус устар» бэстибээл хас биирдии ыччакка умнуллубат, хатыламмат түгэннэри, саҥа билсиһиилэри, сонун идеялары бэлэхтээтэ. Ыччаттар сонун идеяларын, саҥа билиилэрин-көрүүлэрин салгыы сайыннаран, олоххо киллэриэхтэрэ.
Горнай ыччаттара – Чыпчаалга! Ыччаттар бары бииргэ түмсүүлээхтик, ситиһиилээхтик кыттан, сүүрбэ сыл кэнниттэн ыччат ортотугар үрдүк ситиһии кэллэ. Улууспут бастыҥ ыччаттарын, ыччат исписэлииһэ Сардана Максимова күүстээх хамаандатын итиитик-истиҥник эҕэрдэлиибит.