Бэрдьигэстээххэ түөрт күн устата өрөспүүбүлүкэ биир улахан күрэхтэһиитэ ыытылынна. Ол курдук, боксаҕа РСФСР, Саха АССР үтүөлээх тренерэ Арсентий Петров аатынан улахан дьон чемпионата үрдүк таһымҥа барда.
13 ыйааһыҥҥа, 13 хамаанда, 75 спортсмен сыаналаах мэтээл иһин тыҥааһыннаах киирсиини көрдөрдө.
Горнай аатын аҕыс спортсмен көмүскээтэ. Уолаттар бары сыраларын уурдулар, күүстэрин-уохтарын биэрдилэр.
Түмүккэ, 60 кг Николай Павлов, 75 кг Егор Пахомов, 80 кг Петр Степанов, 92 кг үөһээ Айаан Дьячковскай боруонса мэтээли ылар чиэстэннилэр.
Бу кэмҥэ Дьокуускайга үөрэнэ сылдьар Олимпий Оленовы бэлиэтиэҕи баҕарыллар. Кини сылтан сыл сытыы киирсиилэринэн биир биһигини үөрдэр. Күүскэ дьарыктанан, элбэх күрэхтэһиилэргэ кытыннаҕына, кыайыылар кэлиэхтэрэ диэн эрэнэбит.
Бокса ыытыллыбыт күннэрин устата хаһааҥҥытааҕар да элбэх дьон сырытта. Урукку кэмнээҕи аҕам саастаах спортсменнар сытыы киирсиилэртэн олус астыннылар. Бу маннык таһымнаах күрэхтэһии ыытыллыбытаҕа 35 сыл буолбут диэн бэлиэтииллэр. Онон улууспутугар кырасыабай киирсиилэри бэлэхтээбит спортсменнарга махталбытын биллэрэбит.
Вячеслав Алексеев