Кулун тутар 14-16 күннэригэр Бэрдьигэстээххэ Саха АССР үтүөлээх тренерэ Артур Кравченко бирииһигэр 2006-07 сс төрүөх оҕолорго боксаҕа өрөспүүбүлүкэҕэ бастыыр иһин күрэхтэһии үрдүк таһымҥа барда.
Барыта 70-ча эдэр боксер күөн көрүстэ. Оҕолор бэрт тыҥааһыннаах киирсиилэри көрдөрөн, көрөөччүлэргэ үчүгэй бэлэҕи оҥордулар.
Горнай уолаттарыттан ОЭУ устудьуона 54 кг Олимпий Оленов кыһыл көмүс уонна Александр Агеев аатынан спортивнай оскуола иитиллээччитэ 67 кг Максим Павлов боруонса мэтээли ылары ситистилэр. Тренердэр көрдөрүү куһаҕана суох диэн сыаналыыллар.
Кыайыылаахтары таһынан күрэхтэһии бастыҥ боксердарынан ааттанан Кравченколар дьиэ кэргэн уонна Горнайдааҕы бокса федерациятын салайааччыта, Ил Түмэн депута Гаврил Алексеев олохтообут сыаналаах бириистэринэн наҕараадаланнылар:
«Бастыҥ боксер» — Олимпий Оленов, «Бастыҥ киирсии» — Александр Сергучев, Алесандр Иванов, «Кыайыыга дьулуурун иһин» — Сергей Уларов, «Бастыҥ судья» — Семен Румянцев, Кравченколар дьиэ кэргэн анал бирииһин Александр Иванов тутта.
Федерация толорооччу дириэктэрэ Станислав Ноговицын бокса спорда сайдыытыгар мэлдьи үлэлэһэр, спорт бэтэрээннэригэр Федор Кравченкоҕа, Андриан Андреевка, Николай Павловка Саха сирин боксатын историятын кэпсиир кинигэни бэлэх уунна.
Аны кэлэр ыйга улууспутугар спорт, бокса сайдыытыгар сүҥкэн кылааты киллэрбит Афанасий Парфенов аатынан күрэхтэһии буолара күүтүллэр.
Вячеслав Алексеев