Улууспутугар сайдыыны түстээн, улахан объектар тутуллаллар. Кэнники биэс сылга дьон-сэргэ олорор усулуобуйата тупсарыгар үгүс үлэ ыытылынна.
Бэрдьигэстээх киинигэр тупсаҕай көстүүлээх “Эйэ” сквера 2020 с. тутуллубута. Скверга оҕо-аймах дуоһуйа оонньуур, сынньанар сирдээх, спортивнай тренажернайдаах. Россияҕа бастакынан Горнай улууһа дизайн коду киллэрбитэ. «Эйгэ-2022» архитектура бириэмийэтигэр Бэрдьигэстээх дизайн кода “Лучший дизайн среды” номинациянан наҕараадаламмыта.
“38 кыбаартал”, “Сэргэлээх”, “МСО” түөлбэлэригэр саҥа таас, толору хааччыллыылаах уопсай дьиэлэр дьэндэйдилэр. Быйыл МСО түөлбэтигэр сэттэ дьиэ биирдэ тутуллан, үлэҕэ киирбитэ өрөспүүбүлүкэҕэ үтүө холобур буолар. Олохтоохтор саҥа дьиэ күлүүһүн тутан, үөрүүлэрэ муҥура суох.
«Ыраас уу» федеральнай бырагыраама чэрчитинэн Бэрдьигэстээххэ ыраас уу станцията тутулла турар. Станция бэйэтэ икки 300 кубтаах емкостаах буолуоҕа. Сууккаҕа 500 куб ууну сайҕаан таһаарыахтаах. Сүрүн соругунан нэһилиэнньэни иһэр уунан хааччыйыы буолар.
Тутуу РФ Президенэ Владимир Путин көҕүлээһинэнэн тэриллибит «Олорор дьиэ уонна куорат эйгэтэ» национальнай бырайыагын чэрчитинэн ыытыллар.