Горнайга Бырабыыталыстыба отчуота саҕаланна

Үгэс курдук олунньу маҥнайгы күннэриттэн улууспут бары нэһилиэктэрин хабан, ситэриилээх былаас уорганын  2024 с. икки күннээх отчуота саҕаланна. Бэс Күөлүгэр Бырабыыталыстыба ситэриилээх былаас уорганнарын 2024 с отчуота дойду, өрөспүүбүлүкэ өрөгөй ырыаларынан арылынна.

Бүгүн СӨ Үпкэ-харчыга миниистирин солбуйааччы Николай Старостин салайааччылаах  отчуоттуур бөлөх күн бастакы аҥаарыгар Бэс Күөлүгэр үлэлээтэ.

Нэһилиэнньэни кытта көрсүһүүгэ элбэх киһи көхтөөхтүк кытынна. Дьон-сэргэ долгутар ыйытыктарыгар толору хоруйу ыллылар.

Отчуот иннинэ биирдиилээн көрсүһүүгэ маннык ыйытыылар киирдилэр:

Илья Аввакумов, «Кэскил» түөлбэ депутата, элбэх оҕолоох аҕа:

– Сүрүн кыһалҕа бу саҥа тутуллубут “Кэскил” түөлбэ олохтоохторун аатыттан дьиэлэр тымныылара, дьиэлэр акылааттара хамсыыллара кэккэ кыһалҕалары үөскэппитин этэбин. Манна болҕомто ууран, үлэ ыыталларыгар

Валентина Яковлева, биэнсийэлээх:

– Күөх төлөн киирбитэ үчүгэй. Ол эрэн техобслуживаниета ыарахана чаҕытар. Аҥаардас биэнсийэҕэ олорор олохтоох дьон уустуктары көрсөбүт.

Клара Филиппова, биэнсийэлээх:

– Улуус киинигэр көрдөрө барарга ордук аҕа саастаах дьон  кэккэ уустуктары көрсөбүт. Хас да күн ыалга тохтуурга уустуктардаах. Манна олохтоох амбулаториябыт үрдүттэн эмтэнэн, хонуктаах буоларыгар туруорсабыт.

Алексей Петров, «Атамай» бааһынай хаһаайыстыба салайааччыта:

«Ытык эбэ» сайылыкпытыгар  уот өрөмүөнүгэр көмө оҥоһуллуо дуо?

Мунньахха олохтоохтор көхтөөхтүк кытыннылар, туһааннаах ыйытыктарын, баҕа санааларын эттилэр.

Кирилл Иванов, АВС исписэлииһэ:

-Суол быраабылатыгар, ынах ойуулаах бэлиэ иннигэр 100 м иннигэр сэрэтэр бэлиэ турара буоллар.

Диана Федорова, элбэх оҕолоох ийэ, «Радуга» оҕо уһуйаанын сэбиэдиссэйэ:

-«Ийэҕэ албан аат» судаарыстыбаннай наҕараадаҕа улахан оҕобут сааһа хапсыбакка тиксибэтим. Уонна оҕоҕо бэриллэр көмөҕө эмиэ киирсибэтибит. Аҕабыт сирдээх-уоттаах буолан. Маннык балаһыанньаҕа киирэр дьиэ кэргэттэр бааллар. Маны үөрэтэн көрүү ыытыллыа дуо.

Уһуйааммыт «Үтүө дьыала» хамсааһынынан тутуллан, 2015 с. үлэҕэ киирбитэ. Хапытаалынай өрөмүөҥэ көмө көрүллүө дуо?

Афанасий Ефремов, улуустааҕы «Боевое братство» түмсүү салайааччыта:

-Биһиги нэһилиэктэн түөрт уол улаханнык эчэйдэ, биир уолбут икки хараҕын сүтэрдэ. Маннык хорсун быһыыны оҥорбут уолаттарга сир биэриигэ көмө баар буолуо дуо. СВО -ҕа кыттыыны ылбыт уолаттарга Агростартап хайысхатынан дьарыктанааччыга көмө көрүүтүн туоһулаһабын. Уонна уматык сыаната тоҕо үрдүү турарый?

Фекла Иванова, биэнсийэлээх:

Былырыыҥҥы отчуокка киирбит соруктар төһө туоллулар?

Валентина Яковлева, биэнсийэлээх:

-Бырабыыталыстыба отчуота миэстэтигэр ыытыллара табыгастаах. Нэһилиэкпитигэр, улууска сайдыы бара турар. Улууспут баһылыгар Никита Андреевка, улахан салалтаҕа махтанабыт. Үлэҕитигэр үрдүк ситиһиилэри баҕарабыт.

Бырабыыталыстыба бөлөҕө нэһилиэнньэҕэ сырыытыгар тутулла турар элбэх хайысхалаах киини, үлэлии турар саҥа оскуоланы, саҥа тэриллээри турар баһаарынай-быыһыыр чааска миэстэтигэр тиийэн көрдүлэр.

Нина Сутакова