Бүгүн Россия Президенэ Владимир Путин Анал этиитигэр инники соруктары билиһиннэрдэ. Үөрэҕирии эйгэтигэр саҥа уларыйыылар баар буолалларын эттэ.
Анна Степанова, улуустааҕы үөрэх управлениетын уопсай үөрэхтээһинин салайааччыта:
Дойдубут Президенэ Владимир Путин Анал этиитин сэҥээрэн иһиттибит. Мин үөрэх эйгэтин үлэһитэ буолабын. Бастатан туран, дойдубутугар үөрэх тэрилтэлэригэр, чуолаан оскуолаларга, орто-анал үөрэх тэрилтэлэригэр анал үөрэхтээх каадырдар тиийбэттэр. Бу хайысхаҕа, кылаас салайааччыларыгар, дириэктэрдэр иитэр үлэҕэ сүбэһиттэригэр ый аайы эбии хамнас көрүлүннэ, ыам ыйынааҕы Укааһынан учууталлар хамнастарын үрдэтэргэ анал дьаһаллар ылыллыахтара.
Маны таһынан, урукку курдук оскуолаларга медицинскэй кабинеттары тэрийэргэ, оскуолаларга капитальнай өрөмүөннэри ыытан, 2030 сылга диэри хаарбах туруктаах оскуолалар суох буолуохтарын эрэннэрдэ.
Выпускниктар Биир кэлим эксээмэннэри туттаран, баалларын тупсаралларыгар (үрдэтэллэригэр) эбии түгэн биэриэххэ диэтэ.
Иккиһинэн, дойдубутугар үүнэр көлүөнэ, ыччаттарбыт сайдалларыгар туһаайыллыбыт «Россия ыччата», чөл олоҕу тутуһар сыаллаах «Уһун үйэ уонна актыыбынай олох» диэн национальнай бырайыактар олоххо киирэр буоллулар. Экономика, производство уо.д.а. эйгэлэргэ болҕомто ууруллара саарбаҕа суох.
Бу барыта Россиябыт дьонугар-сэргэтигэр, үүнэр көлүөнэҕэ, ыччаттарбытыгар инникигэ эрэли үөскэтэрэ чуолкай. Улахан сайдыылаах, модун, улуу судаарыстыба буоларбытыгар улахан тирэх, олук буолар диэн сыаналыыбын.