Соторутааҕыта хорсун, хоодуот, биир дойдулаахпыт Александр Федоров Донецкай Нью-Йорк бөһүөлэгэр бойобуой сорудахха сылдьан, араанньы буолан, тыыннаах хаалар сыалтан атаҕын быстыбытын туһунан сырдаппыппыт. Бу кэмнэргэ Александр Федоровы Москваҕа аҕалан, Н.Н Бурденко аатынан байыаннай госпитальга эмтэнии баран, бэҕэһээ үрүҥ халааттаах аанньаллар атаҕар эпэрээссийэ оҥордулар.
Барыта этэҥҥэ ааста, ириҥэбин ыраастаатылар. Дойдум дьонугар барҕа махталбын тириэрдэбин, киһиэхэ кыра да болҕомто санааны кынаттыырын бигэтик биллим. Сотору дойдубар барыам,- диэн Александр үөрүүтүн үллэһиннэ.
Хорсун хоодуот уолбутугар кытаанах санааны, дойдуга ытык иэһиҥ, бэриниилээх бигэ тутулуҥ, күн ийэҕэр күүстээх тапталыҥ, доҕотторгор убаастабылыҥ инники кэскиллээх олоххор ыллыктаах аартыктары сирдии, ситиһиилэргэ угуйа туруохтун.
Нина Сутакова