Бүгүҥҥү туругунан СӨ «Горнайдааҕы кырдьаҕастар уонна инбэлииттэр интернат-дьиэлэригэр» Чурапчыттан, Амматтан, Үөһээ Бүлүүттэн, Кэбээйиттэн, Тиксииттэн Горнайтан 25 көрүүтэ-истиитэ суох хаалбыт дьон биир дьиэ кэргэн курдук олороллор. Уопсайа 15 үлэһиттээх. Манна араас улуустартан көрүүгэ-истиигэ наадыйар, кырдьаҕас уонна кыаммат, инбэлиит дьон кэлэн олороллор. Кинилэргэ интэринээт үлэһиттэрэ социальнай-реабилитационнай, медицинскэй, психологическай уо.д.а өҥөлөрү оҥороллор. Үтүө санаалаах үлэһиттэр туох баар күүстэрин, кыахтарын ууран, күннэтэ көрөллөр-истэллэр, сынньалаҥнарын тэрийэллэр, олохторун уһатарга кыһаллаллар.
Бүгүн биһиги редакциябыт, бу дьиэҕэ ыалдьыттаата, олохтоохтору кытта көрүстэ.
Ол курдук, кырдьаҕастарга биһиги хаһыаппыт геройа Николай Алексеев-Мөлдьөөт Өлөөнү айар үлэтин, таһаарбыт кинигэлэрин туһунан интернат олохтоохторугар кэпсээтэ, сырдатта.
Кырдьаҕастар биһигини олус үөрэ көрүстүлэр. Мөлдьөөт Өлөөнүгэ улууспут историятыгар сыһыаннаах араас ыйытыылары биэрдилэр, айар үлэтигэр ситиһиилэри баҕардылар. Бэйиэт кинилэргэ утары бэлэҕин-үс суруйбут кинигэтин туттарда.
Бу курдук, улууспут олохтоохторо, тэрилтэлэрэ, биирдиилээн даҕаны дьоннор аттыбытыгар баар соҕотох кырдьаҕастарга болҕомто ууран, кинилэри сэргэхситэн, маннык араас тэрээһиннэри ыытыаххытын сөп.
Соҕотох хаалбыт инбэлииттэри, кырдьаҕастары аһынан, төһө даҕаны харах уулаах көрсүһүү буоллар, кинилэр үөрбүт харахтарын көрөн, киһи сүргэтэ көтөҕүллэр.
Интернакка олорор дьон бу ааспыт хамсык ыарыы хааччахтааһынынан сибээстээн, өр кэмҥэ дьону кытта көрсүбэккэ олорбут тэйсиилэрин чугаһатан, маннык көмө үлэтэ ыытыллара олус наадалаах.
Улууспут интернатыгар үйэлэрин-саастарын тухары үлэлээн, улууспут сайдыытыгар тус кылааттарын киллэрсибит дьоннор аҕыйаҕа суохтар. Ону таһынан, тэрилтэ республика таһымнаах буолан, атын улуустартан кэлэн, олорор да дьон үгүс.
Түгэнинэн туһанан, биһиги хаһыаппыт геройугар, дьон кутун туппут бэйиэппитигэр үтүө санаатынан олус истиҥ көрсүһүү оҥорбутугар махтанабыт уонна айар үлэтигэр ситиһиилэри баҕарабыт! Маннык тэрээһин өссө да ыытыллыа, үтүө үгэскэ кубулуйуо диэн эрэнэбит.
Бу курдук Горнайдааҕы интэринээт-дьиэҕэ кырдьаҕастарга болҕомто өрүү ууруллар, кинилэр олохторун чэпчэтэргэ, киэргэтэргэ үлэһиттэр эрэ буолбакка, уопсастыбаннас эмиэ кыттыһара наадалааҕын умнумуохха.
Күннэй Алексеева