Аһымаҕа «Одуванчик» уһуйаан нэһилиэккэ биир саамай актыыбынай, талааннаах үлэһиттэрдээх кэлэктиип буолар. Сэбиэдиссэй Дария Парникова, профком бэрэссэдээтэлэ Нина Капитонова. Быйыл биллэриллибит Үлэ сылыгар араас куоҥкурустарга ситиһиилэрин түмүгүн сырдатар сыаллаах Сынньалаҥ киинигэр кэнсиэртэрэ тэрээһиннээхтик ыытыллыбыта. Кэнсиэркэ өрөспүүбүлүкэҕэ иккис миэстэ буолбут «Соколенок» хамаанда, Надежда Макарова авторскай өрөспүүбүлүкэтээҕи куоҥкуруһугар 1 миэстэни ылбыт “Чуораанчык” ырыа ансаамбыла, “Звезда Победы” хоһоон күрэһин Гран-при хаһаайына Василина Павлова о.д.а сэргэх нүөмэрдэри бэлэхтээтилэр.
Иллээх кэлэктиип үлэһиттэрэ СВО-ҕа барбыт дьоммут Марианна Дьячковская, Мая Кириллова дьиэ кэргэттэригэр мас эрбээн, саһаан туруоран, дьиэ ханапаакылаан, күүстээх субуотунньук ыыттылар. Хаһаайкалар махталларын биллэрэллэр.
Иитээччилэр Марианна Дьячковская, Дор Егорова «Току-току ньээм-ньээм» остуоруйаларын бырайыактара улуус баһылыгын гранынан наҕараадаламмыта.
«Одуванчик» уһуйаан кэлэктиибин айымньылаах үлэтэ үтүө холобур буолар.
Антонина Дьячковская