Алтынньы 6 күнүгэр Кировскай нэһилиэгэр, саҥа арыллыбыт «Кырсаада» дьону сынньатар туристическай баазаҕа сулумах эдэр дьоҥҥо аналлаах «Дьол тааһа» тэрээһин буолан ааста.
Бу тэрээһин улуустааҕы социальнай политика отделын муниципальнай программатыгар олоҕуран Кировскай нэһилиэгин дьаһалтата, сынньалаҥ киинэ тэрийиилэринэн улууска аан бастакытын ыытылынна. Манна Кировскай уонна Бэрдьигэстээх нэһилиэгин эдэр дьоно кэлэн 2 хамаандаҕа арахсан кытыннылар. Атын нэһилиэктэр кыттыыны ылбатахтара хомолтолоох.
Тэрээһин хамаандаҕа арахсан күрэхтэһии быһыытынан тус-туспа этааптарынан барда. Ол курдук, бастакы этаапка Кировскай нэһилиэгин музейыгар баар, урукку кэмҥэ туттулла сылдьыбыт маллары, киһи хараҕын эрэ көрөн ким буоларын таайыы квест-оонньуу буолла. Салгыы КП көрдөөһүнэ, миэстэттэн ыстаныы, үүт эрийэр сэпэрээтэри ыһыы-хомуйуу, быаны туомтуу баайыы, күерчэх ытыйыы күрэхтэрэ, музыкальнай түһүмэх ыытылынна.
Күрэхтэһии быыһыгар психологическай тренины психолог Сахая Прокопьевна Платонова ыытта. Онтон хамаандалар Бэрдьигэстээххэ баран ыйыллыбыт сорудаҕынан 10 сиргэ хаартыскаҕа түһэн кэллилэр.
Түмүккэ «Тайах» хамаанда кыайыылаах таҕыста уонна «Мааttа house» гостевой дьиэҕэ сынньанарга 12000 солкуобайдаах сертификатынан наҕараадаланна. Иккис миэстэни «Кырсаада» хамаанда ылла уонна 8000 солкуобайдаах «Кырсаада» туристическай базаҕа сынньанар сертификаты туттулар. Кистэлэҥ куоластааһын түмүгүнэн биир паараҕа «Бэйэ дьоно» кафеҕа 3000 суумалаах сертификат туттарылынна. Бу күнү интэриэһинэйдик, сонуннук атаарбыттарыттан кэлбит дьон астынан тарҕастылар.
Эдэр дьон түмсэн салгыы билсиһэллэригэр анаан улууска бастакытын тэриллибит аныгы былаһааккаҕа инникитин өссө элбэх киһи кытта кэлиэ диэн эрэнэбит.
Саргылана Аргунова, Кировскай нэһилиэгин баһылыгын сообуйааччыта.