Октябрьскай нэһилиэгин сис ыаллара Зинаида, Гаврил Петровтар сүүрбэттэн тахса сыл түргэнник ситэр көтөрдөрү иитиинэн уонна кэтэх хаһаайыстыбалаах тумус туттар биир дойдулаахтарбыт.
Кэлиҥҥи сылларга улуус дьонугар-сэргэтигэр атыылаан, туһалаах өҥөнү-көмөнү оҥороллор.
«Былырыын соцконтрак ылан, биирдэ элбэх сымыыты уган таһаарар улахан Инкубаторы уонна «Брудер» диэн чоппууска уйатын ылбыппыт.
Ахсынньы 25 күнүгэр Мастер грей диэн куурусса боруода сымыытын 359-һу укпуппутуттан, тохсунньу 15 күнүгэр 249 чоппуусканы таһааран үөртэ.
Бу Мастер Грей куурусса боруодата 3,4,5 ыйынан сымыыттаан барар, ол аата маай саҥатыгар сымыыттаан саҕалыыр. Биһиэхэ кылгас сайыннаах сахабыт сиригэр олус табыгастаах боруода диэн сакаастаабыппыт. Сотору атыыга тахсыахтара. Биир чоппууска сыаната билигин 250 солк.тэҥнэһэр. Онон «атыылаһыҥ, эбии аһылык оҥостуҥ, ииттиҥ » диэн соҕуруу дойду көтөрдөрүн, кустарын иитэр, алаһа дьиэ хаһаайката Зинаида Сидорова санаатын үллэстэр.
Түгэнинэн туһанан улуус дьаһалтата үлэлээбэт биэнсийэлээх дьон дьарыктаах буолалларыгар болҕомто уурарын сыаналаан туран, улуус баһылыгар Никита Андреевка махталын тириэртэ.
Нина Сутакова