Сэтинньи 7 күнүгэр өрөспүүбүлүкэҕэ, улууска биир бастыҥ үлэлээх «Кырачаан ымыылар» оҕо уһуйаана төрүттэммитэ 10 сыллаах үбүлүөйдэрин өрө көтөҕүллэн туран бэлиэтээтилэр. Сып-сырдык, ыраас, оҕо сайдарыгар анаан оҥоһуллубут уһуйааҥҥа оҕолор чуопчаарар саҥаларынан доҕуһуоллатан үөрүүлээх арыллыыта ыытылынна.
Бу күн «Кырачаан ымыылар» төрөппүттэрэ ис дууһаларыттан араас минньигэс тортары оҥорбуттар.
Бэлиэ күн умнуллубат түгэнинэн уһуйаан аатын сырдатар, аныгылыы уоттаах-күөстээх, ыраахтан угуйар киирии аартык арыллыыта буолла. Бу аартыгы биир дойдулаахпыт, урбаанньыт Егор Кардашевскай оҥорбут.
«Кырачаан ымыылар» 10 сыллаах бэлиэ күннэрин көрсө нэһилиэнньэҕэ улахан эҕэрдэ кэнсиэри бэлэх ууннулар. Кэнсиэри уһуйаан иитээччитэ, улуус мелодистарын сойууһун чилиэнэ Светлана Никифорова тылларыгар уонна мелодиятыгар «Кырачаан ымыылар» оҕону сайыннарар киин Өрөгөй ырыатынан саҕалаатылар.
Үөрүүлээх тэрээһиҥҥэ улуус баһылыгын солбуйааччы Сардаана Стручкова, Бэрдьигэстээх нэһилиэгин баһылыгын солбуйааччы Ксения Васильева, улуус мунньаҕын Сэбиэтин бэрэссэдээтэлэ Маргарита Константинова, үөрэх улуустааҕы управлениетын начаалынньыгын солбуйааччыта Аина Егорова уонна улуус уһуйааннарын салайааччыта Ньургустаана Абрамова истиҥ эҕэрдэлэрин эттилэр, наҕараадалары туттардылар. Улуус дьаһалтата доруобуйаларынан хааччахтаах, инбэлиит оҕолорго усулуобуйа тэрийэргэ диэн 1 мөл.суумалаах сертификаты бэлэх уунна.
«Кырачаан ымыылар» оҕо уһуйаана бу сылтан саҥа анаммыт «Бастыҥ иитиллээччи», «Бастыҥ выпускник» стипендияларын бастыҥтан бастыҥ ситиһиилээх иитиллээччилэригэр туттардылар.
“Үөрэтии-иитии Бочуоттаах настаабынньыга” бэлиэнэн Айталина Софронеева, Валентина Ефимова, Любовь Мордовская, Наталья Осипова, СӨ үөрэххэ уонна наукаҕа министиэристибэтин Бочуотунай грамотатынан Елизавета Федорова, Мария Матвеева, СӨ үөрэххэ уонна наукаҕа министиэристибэтин Махтал суругунан Анисия Мордовская, Марианна Лукина, Горнай улууһун депутаттарын Сэбиэтин Бочуотунай грамотатынан, «Улуус сайдыытыгар кылаатын иһин» бэлиэнэн Надежда Москвитина бэлиэтэннилэр.
Бу күн уһуйаан кэлэктиибэ үрдүк сыанаттан бэтэрээн үлэһиттэригэр махтал үтүө тылларын анаатылар. Дойду, Ил Дархан Гранын хас да төгүллээх кыайыылаахтара, «Бастыҥ тыа сирин уһуйаана», Россиятааҕы күрэс түмүгүнэн «Образцовый детский сад» анал аат хаһаайыттарыгар «Кырачаан ымыыларга» кэскиллээх-инникилээх үлэҕитинэн, үрдүк ситиһиилэргитинэн сайдыыны түстэһэ, кэскили кэрэһилии тураргытыгар баҕарабыт.
Нина Сутакова