От ыйын 8 күнүгэр Маҥаныга Үрдүк өтөх алааһыгар «Күүлэй-2023» дьиэ кэргэнинэн от охсуута буолла. Күрэхтэһии от охсуутун тарҕатааччы, хотуур түмэлин төрүттээччи, от охсуутугар өрөспүүбүлүкэ хас да төгүллээх чемпиона Марк Слепцов 75 сааһыгар ананна.
Өбүгэ саҕаттан илдьэ кэлбит төрүт дьарыкпыт күрэхтэһиитигэр илии хотуурунан түөрт, мотокосанан охсууга эр дьоҥҥо уонна кэрэ аҥаардарга үстүү киһи бастыҥ ааты былдьаста.
Күн бастакы аҥарыгар дохсуннаах ардах түһэн кыттааччыларга уустуктаах курдук буолла. Ол эрэн, отчуттар ходуһаҕа тахсааттарын кытары ибиирэ турбут самыыр тохтоон, сөрүүн салгын үрэн, охсооччуларга айылҕа бэйэтэ усулуобуйа олохтоото.
Кыттааччылар төһө да аҕыйах буоллаллар, бэйэ икки ардыгар киирсии олус тыҥааһыннаахтык барда. Охсооччулар утарсааччыларын манаһаннар бэл диэтэр сынньанан да көрбөтүлэр.
Түмүккэ, сорудахтаммыт 50 суотай сирин Көтөттөн Филипп Чемезов быраатынаан Павеллыын бастакынан бүтэрдилэр (2 ч 28 мүн).
Кинилэртэн бэрт балачча хаалан, Бэрдьигэстээхтэн Иван Васильев уолунаан Ньургуннуун түмүктээтилэр (2:36).
Мотокосанан охсууга олохтоох дьон көхтөөхтүк кытынна. Отчуттар 20 суотайга туруннулар. Бастакы миэстэни
Маҥаны нэһилиэгин дьоно-сэргэтэ урукку сыллартан от охсуутун өрө туталлар. Ыччаттарыгар кыра саастарыттан хотууру туттараллар. Ол иһин бары үлэни кыайар-хотор дьон буола улааталлар.
Кэлэр да өттүгэр төрүттэрбит илдьэ кэлбит дьарыктарын сүтэрбэт, үүнэр көлүөнэҕэ тириэрдэр туһуттан, маннык күрэхтэһиилэри ыытарга былаан ылылынна.
Вячеслав Алексеев