Горнай улууһун Маалтааны «Сардаана» үнкүү бөлөҕө дойдубут тэбэр сүрэҕэр Москубаҕа ыытыллыбыт «Россия Кубога» норуоттар икки ардыларынааҕы Грантовай куоҥкурус-фестивальга кыттан, «Муода театра» номинацияҕа I степэннээх лауреат аатын ыллылар.
Ахсынньы 5-9 күннэригэр «Сардаана» бөлөх салайааччыта Виктория Игнатьева уонна Маалтааны нэһилиэгин Далбар мааны Хотуттара уон буолан айаннарын саҕалаабыттара. Москва куорат кэрэ сирдэрин, көрөн уонна үрдүк таһымнаах күрэскэ кыттан улахан ситиһиилэммиттэринэн эҕэрдэлиибит.
«Сардаана» бөлөх кыттыылааҕа Горнай улууһун норуотун маастара Нонна Варламова көҕүлээһининэн ыйыытынан-кэрдиитинэн, сүбэтинэн-аматынан бэйэлэрэ илиилэринэн тикпит кытыылаах соннорун, дьабака бэргэһэлэрин, үтүлүктэрин, хаппардарын киһи эрэ сэргиэн, сөҕүөн — махтайыан курдук оҥостон, бу күрэскэ кыайыы үктэлин ылбыттарыттан олус үөрдүбүт.
Биир дойдулаахтарбыт ситиһиилэриттэн үөрэн-көтөн тураммыт, инникитин өссө элбэх ситиһиилэри, кыайыыны-хотууну аҕала туруохтара диэн эрэнэбит. Төрөөбүт дойдуларын Саха сирин, улуустарын, нэһилиэктэрин ааттарын киэҥ эйгэҕэ ааттаппыттарыттан киэн туттабыт.
Кэптиннээҕи сынньалаҥ киинэ