Ааспыт өрөбүллэргэ Чурапчыга мас тардыһыытыгар Гаврил Десяткин аатынан өрөспүүбүлүкэ чемпионата киэҥ хабааннаах, дуорааннаахтык буолан ааста.
Күрэхтэһиигэ аны сайын Тааттаҕа ыытыллыахтаах Манчаары оонньууларыгар кыттарга хас ыйааһын ахсын эр дьоҥҥо уоннуу, кэрэ аҥаардарга, бэтээрээннэргэ алталыы путевкалар оонньононнор, өрөспүүбүлүкэ бастыҥ спортсменнар бары кииристилэр. Барыта 500-кэ мадьыны мэтээл иһин таҕыста.
Бу улахан күрэхтэһиигэ Горнай спортсменнара куһаҕана суох көрдөрүүлэннилэр.
Ол курдук, Виктория Алексеева, Семен Борисов боруонса мэтээллэри ыллылар. Кинилэри кытары 60 кг Константин Алексеев, 80 кг Николай Текеянов, 95 кг Петр Попов ытык Таатта сиригэр Манчаары оонньууларыгар улуус аатын көмүскүөхтэрэ.
Чурапчы түһүлгэтин кэнниттэн муус устар ыйга Петр Каратаев аатынан күрэхтэһиигэ Саха сирин Олимпиадатынан биллэр оонньууларга бүтэһик путевкалар туруохтара. Онно биһиги кыргыттарбыт, уолаттарбыт ситиһиилээхтик кыттарга бэлэмнэниэхтэрэ. Биир дойдулаахтарбытыгар ситиһиилэри баҕарыаҕыҥ.
Вячеслав Алексеев