Николай Ж, ДНР сулууспалыы сылдьар биир дойдулаахпыт:
– Саха сирин Ил Дархана Айсен Николаев СВО-ҕа сылдьар уолаттарга элбэҕи көмөлөһөр. Уопсай үлэҕэ өрөспүүбүлүкэ бары олохтоохторо кыттыһан, кыайыы туһугар бары кыһамньыларын ууралларыттан астынабыт, санаабыт күүһүрэр. Өрөспүүбүлүкэттэн элбэҕи туттубут малы-салы, таҥаһы-сабы этэ да барбаккын. “Антидрон”, оптика, түүнүн сырдатан көрдөрөр тэриллэр, “Сокол” тиэхиньикэтэ кэлбитэ элбэҕи туһалаата. Бааһырыы ылбыт уолаттарга госпитальга элбэх үлэ барарын бэлиэтиэхпин баҕарабын. Волонтердар, опорнай пууҥҥа үлэлиир дьон сыаналаммат өҥөлөөхтөр. Онон махталбыт муҥура суох.
Аҕыйах хонуктааҕыта Горнай улууһун салалтата кэлэн биһигини көрсөн барда. Кэһии бөҕөтүн аҕаллылар. Дойдубут аһын-үөлүн амсайан, дьиэбитигэр сылдьыбыт курдук сананныбыт. Олус наадалаах тэриллэри биэрдилэр. Күндү биир дойдулаахтарбытын биһигини өйдүүргүт, өйүүргүт, күүтэргит иһин улахан махталбытын тириэрдэбит. Кэлэн иһэр Саҥа Дьылынан тапталлаах төрөппүттэрбин, кэргэммин, оҕолорбун, чугас дьоммун-сэргэбин, улууспут олохтоохторун барыларын итиитик-истиҥник эҕэрдэлиибин, бары дьоллоох, доруобай буолуҥ! Кыайыы биһиги туспутугар!
Александр А, ДНР сулууспалыы сылдьар биир дойдулаахпыт:
– Мин от ыйыгар СВО-ҕа киирбитим. Билигин кыра бааһырыы ыламмын госпитальга эмтэнэ сылдьабын. Манна барыта баар. Көрүүлэрэ-истиилэрэ үчүгэй. Саха сирин Ил Дархана Айсен Николаев биһиги байыастарбытын улахан көмөнү оҥорор. Фронт хайысхатынан устатынан элбэх саха баар. Онно барыларын хабан, өрөспүүбүлүкэттэн таҥас-сап эрэ буолбакка, олус наадалаах антидроннары, түүнүн сырдатар оптикалары ыыталлар.
Ил Дархан быһа эфиригэр СВО сылдьар саллааттары өйүүргэ этиитин тириэртилэр. Махталлаах дьыала. Биһиэхэ ити күүспүтүгэр күүс, сэниэбитигэр сэниэ эбэр, инникигэ эрэллээхпит диэн бэлиэтиэхпин баҕарабын.
Наһаа долгуйумаҥ. Манна Горнайдар бэйэ-бэйэбитин көрө-истэ, өйөһө, көмөлөсүһэ сылдьабыт. Бары этэҥҥэ тиийиэхпит. Горнай улууһун дьаһалтатыгар, олохтоохторугар улахан көмөҕүт иһин махтал буоллун. Түгэнинэн туһанан кэлэн иһэр Саҥа дьылынан кэргэммин, оҕолорбун, аймахтарбын, доҕотторбун, биир дойдулаахтарбын эҕэрдэлиибин. Ростовка опорнай пууҥҥа үлэлиир дьоҥҥо, биһиэхэ көмөҕүт иһин махталбын тириэрдэбин. Бары дьоллоох буолуҥ.
Вячеслав Алексеев