Сэтинньи 22 күнүгэр Маҥаныга Россияҕа Дьиэ кэргэн, өрөспүүбүлүкэбитигэр Оҕо сылын чэрчитинэн, Маҥаны нэһилиэгэ төрүттэммитэ 130 сылыгар анаммыт «Аҕа кыыһынаан» өрөспүүбүлүкэтээҕи аһаҕас күрэс ыытылынна. Тэрээһин улуус баһылыгын гранын ылбыта.
Бырайыак ааптарынан улахан дьиэ кэргэн тапталлаах аҕата, эһэтэ, кэргэнэ, СӨ Норуотун айымньытын сайдыытыгар киллэрсибит кылаатын иһин мэтээл хаһаайына, «Аҕа статуһун үрдэтэр уонна аҕа институтун бөҕөргөтүүтүн кылаатын иһин» бэлиэлээх, айылҕаттан талааннаах, бастыҥ оһуохайдьыт, алгысчыт, мелодист, спорт бэтэрээнэ Семен Никифоров буолар.
Күрэскэ Маҥаныттан Сайаана, Афанасий Алексеевтар, Атамайтан Аделина, Дмитрий Аввакумовтар, Бэрдьигэстээхтэн Сардаана, Анатолий Лю-Фалар, Одунуттан Айыына, Айтал Никаноровтар дьиэ кэргэттэрэ кытыннылар.
Аҕа-дьиэ кэргэн сүнньэ, туллубат тулааһына, тирэҕэ, сирдьитэ, эрэлэ буолар. Одун хаантан ойдубат оҥоһуулаах, айыы таҥараттан ахсаабат айдарыылаах, үрүҥ күнтэн тардыылаах үрэллибэт үс куттаах амарах аҕалар-кэскили түстэһэр, кэнчээрини кэҥэтэр, кэлэр кэми киэргэтэр кэрэчээн кыргыттарынаан «Бэйэни билиһиннэрии», «Соһуччу түһүмэх», «Талба талаан түһүлгэтэ», «Дьиэ кэргэн бырайыага», «Биһиги истиилбит» диэн түһүмэхтэринэн күрэспитин киэргэттилэр.
Күрэс түмүгүнэн «Талааннаах дьиэ кэргэн»-Айыына, Айтал Никаноровтар (Одуну), «Үтүө үгэстээх дьиэ кэргэн»-Сайаана, Афанасий Алексеевтар (Маҥаны), «Сайдам дьиэ кэргэн»-Аделина, Дмитрий Аввакумовтар (Атамай),
«Истиҥ сыһыаннаах дьиэ кэргэн»- Сардаана, Анатолий Лю-фа (Бэрдьигэстээх) номинациянан, харчынан бириэмийэнэн наҕараадаланнылар.
Муҥутуур кыайыылааҕынан Одунуттан Айыына, Айтал Никаноровтар дьиэ кэргэттэрэ ааттанан
30000 солк. сертификатынан, нэһилиэк дьонун -сэргэтин, дьаһалтатын анал бириистэрин туттулар. Ону таһынан нэһилиэк эр дьонун түмсүүтэ күрэххэ кыттыбыт бары дьиэ кэргэттэргэ сертификаттарынан, бириистэринэн уонна муҥутуур кыайыылаахтарга аҕатыгар (20000 солк. суумалаах кыыһыгар 10000 солк. суумалаах сертификаттарын бэлэх ууннулар.
«Семен Кириллович Никифоров аатынан» анал бириистэри кини дьиэ кэргэттэрин, чугас аймахтарын ааттарыттан Аделина, Дмитрий Аввакумовтар, Сайаана, Афанасий Алексеевтар дьиэ кэргэттэригэр анаатылар.
Мария Осипова