Спорт көрүҥнэриттэн биир саамай туһалаахтара, наадалаахтара — остуол тенниһэ диэн мээнэҕэ эппэттэр.
Билигин бу көрүҥ Аан дойду үрдүнэн күүскэ сайдан турар. Ордук Кытайга, Дьоппуонньаҕа, Кэриэйэҕэ. Онно оҕо барыта бу көрүҥүнэн олох кыра эрдэхтэриттэн дьарыктанар.
Оттон сааһырбыт, кырдьаҕас дьон эмиэ остуол тенниһинэн бырахпакка умсугуйалларынан уһун үйэлэнэллэр дииллэр.
Теннис — саамай үчүгэй, элбэх хамсаныылаах доруобуйаҕа ураты туһалаах оонньуу. Ордук киһи хараҕын кытта эрчийэр эбит.
Тустуу, бокса о.д.а көрүҥнэр курдук, улаханнык травмаламмаккын. Кэлин олоххор ыарахаттары көрсүбэккин.
Былырыын Горнайга Сунтаартан биллиилээх тренер Аркадий Степанович Максимов остуол тенниһигэр оҕолорго тренердии кэлбитэ.
Спортивнай оскуолабыт оҕолоро утумнаах эрчиллии кэнниттэн, тута эбиллэн барбыттара. Өрөспүүбүлүкэ оҕолорго күрэхтэһиилэригэр ситиһиилэммиттэрэ.
Олохтоох дьон, төрөппүттэр, учууталлар төһө кыалларынан элбэх оҕо дьарыктанарын ситиһиэхтээх этибит. Баҕалаах бүгүҥҥү күҥҥэ санаа хоту элбэх буолбатах.
Дьарыктанарга нэһилиэк дьаһалтата хаһааҥҥытааҕар да толору усулуобуйаны тэрийэр.
Парфенов аатынан спортивнай оскуолаҕа түөрт остуол мэлдьи тардыллан турар.
Ким баҕарар кэл да оонньоо. Физическэй култуура, маассабай спорт сайыннарыы киинэ маассабай спорка 4 саҥа остуолу атыылаһан биэрдэ.
Элбэх чулуу спортсменнары ииппит, Кытайга тиийэ үөрэммит тренер А.С.Максимов бэйэтинэн Бэрдьигэстээххэ олохсуйан, оҕолору күнү быһа сыралаһан эрчийэр. Иллэҥ кэмигэр улахан дьону кытта дьарыктыыр.
Көрүҥүтүүй, бу иккис кылаас үөрэнээччитэ Риана Чемезова хайдах курдук үчүгэйдик оонньуур буолбутуй?!
Биир эрэ сыл курдук дьарыктаннаҕа. Өссө бэйэтинээҕэр улахан саастаах оҕолор бөлөхтөрүгэр киирэн кыайталаан, улууска иккис миэстэ буола охсубут. Кини аны уонча сыл маннык дьарыктаннын? Чемпионнарбыт, улууспутун ааттатар спортсменнарбыт, талааннаах тренергэ дьарыктанан, мантан үүнэн тахсыа этилэр буоллаҕа!!!
Бу остуолтан быгар эрэ оҕо барахсан, оонньуурун көрө олорон, кими баҕарар дуоһуйуу, астыныы үөрүүтэ кууһар буолуохтаах дии саныыгын. Итиэннэ ситиһиини, бу көрүҥүнэн элбэх оҕо дьарыктаныан эрэ баҕарабыт.
Билэргит курдук, бу аҕыс саастаах оҕо аттынааҕы иккис остуолга, 82 саастаах Егор Павлов эрчиллэ турарын астына көрөҕүт…
Остуол тенниһэ ити курдук, сааһы билиммэккэ, эдэрдэр олохторун аргыһа буолан, үгүстэри өрүү бэйэтигэр ыҥыра, угуйа, сайыннара турдун.
Василий Алексеев