Бэс ыйын 4 күнүгэр Бэрдьигэстээххэ оҕунан ытыыга оҕолорго өрөспүүбүлүкэҕэ бастыыр иһин күрэхтэһии түмүктэннэ. “Чыпчаал” стадионугар 14 хамаанда, 149 спортсмен 50 уонна 70 м. бастыҥ ааты былдьаста. Уопсай түмүккэ, Горнай хамаандата (5 кыһыл, 2 үрүҥ көмүс, 5 боруонса мэтээл) кыайыылаах үрдүк аатын ыыла. Иккис миэстэ Сунтаар (3-2-2), үһүс Мэҥэ Хаҥалас (2-4-2) буолла.
Күрэхтэһии олус быһаарыылаах. Бастыҥнар бу ый бүтүүтэ Дьокуускайга ыытылыахтаах VIII “Азия оҕолоро” оонньууларыгар уонна сотору кэминэн Агинскайга буолуохтаах Россия чемпионатыгар кыттарга бэлэмнэниэхтэрэ. Эппиэтинэстээх старт иннинэ тренер кинилэргэ улахан болҕомтону уурар.
Ньургустаан Федоров, өрөспүүбүлүкэ эдэрдэргэ хамаандатын ыстаарсай тренерэ.
– “Азия оҕолоро” оонньууларыгар хамаанда быһаарыллан турар. Икки састаабынан алта кыыс, алта уол киирдэ. Ох спорда сайдан, оҕолор ортолоругар улахан күрэстэһии буолла. Бары улуустарга көхтөөх үлэ барара көстөр. Бу кэнниттэн “Азия оҕолоругар” диэри Дьокуускайга музыка үрдүкү оскуолатын объегар сүүмэрдиир дьарыктар барыахтара. Услуобуйа олох үчүгэй. Онон өрөспүүбүлүкэ чиэһин түһэн биэрбэт туһугар бары сырабытын ууруохпут.
Сүрүн утарсааччыларбытынан биллэрин курдук Бурятия, Забайкальскай кыраай спортсменнара буолаллар. Иркутскайдар, красноярскайдар, москубалар куһаҕана суох бэлэмнээхтэр. Бэйэбит дойдубутуттан кэлээччилэр бары олус үчүгэй бэлэмнээхтэр. Тастан биэс хамаанда чопчу кэлиэхтээх. Олортон үгүстэрин кытары күрэхтэспит буоламмыт, билэттиибит диэххэ сөп. Белоруссия спортсменнарын кытары утарыта көрсө иликпит.
“Азия оҕолоро” оонньууларын таһыма олус үрдээтэ. Инники сылларга хамаандалар икки састаабынан игин кэлэр эбит буоллахтарына, бу сырыыга 1 №-дэрин аҕалаллара биллэр. Онон үчүгэй, сытыы кирисиилэри күүтэбит.
«Чыпчаал» стадион олус үчүгэй. Биһиги ытарбытыгар барыта сөп түбэһэр. Инники эмиэ хаста да кэлэ сылдьыбыппыт. Олохтоохтор бары усулуобуйаны мэлдьи тэрийэллэр. Онон махтаныах тустаахпыт.
Кыайыылаахтары наҕараадалааһын кэнниттэн Ньургустаан Федоров VIII «Азия оҕолоро» оонньууга оҕунан ытыыга Саха сирин аатын көмүскүүр спортсменнары ааттаталаата. Хамаанда састаабыгар киирдилэр: Цыцык Намсараева, Айыына Васильева, Кристина Дрозд, Светлана Колодезникова, Алиса Кириллина, Нишан Саламова, Владимир Ким, Прокопий Терехов,Тимур Чусовской, Амир Попов, Самсон Спиридонов, Спартак Чемпосов.
Спортсменнарбытыгар, тренердэргэ ситиһиилэри баҕарабыт. Кыайыыларынан биһигини үөрдүөхтэрэ диэн эрэнэбит.
Вячеслав Алексеев.