Олунньу 8 күнүгэр Одунуга өрөспүүбүлүкэтээҕи «ДУОРААН – 2025» тыыннаах музыка куоҥкуруһа үрдүк таһымҥа буолла.
Тыыннаах музыка… Тыыннаах дорҕоон, доҕуһуол… Олус да ахтыбыт эбиппит… 9 саастаах ырыаһыт кыысчаан, 10 саастаах музыканнар, гитараны эймэһитэ ыллаталлар, барабааны дьигиһитэ охсоллор, саха төрүт инструменыгар кырыымпаны кылыһахтатан оонньотоллор. Ураты тыыннаах бэртээхэй күрэс буолан биэрдэ.
Куоҥкуруска 8 бөлөх Амматтан, Чурапчыттан, Хаҥаластан, Ньурбаттан уонна Хатастан, Дьокуускайтан А.Д.Макарова аатынан Культура уонна искусства колледжыттан кытынна.
Дьүүллүүр сүбэҕэ Саха сирин мелодистарын союһун чилиэнэ, өрөспүүбүлүкэ элбэх улуустарын кэрийэн ВИА бөлөхтөрү тэрийсибит, «Айталы», «Эҥсиэли», «Һээдьэ», «Айхал» бөлөхтөргө оонньообут. Николай Пономарев, «Айталы», «Эҥсиэли», «Һээдьэ», «Айхал» бөлөхтөргө оонньообут. Бэрдьигэстээхтэн «Сайыы» бөлөх ударнай инструменын музыкана Анна Алексеева, «Сайыы» бөлөх бас-гитариһа Варвара Алексеева, уонна Маҕарастан Василий Скрыбыкин үлэлээтилэр.
Күрэс түмүгүнэн Кылаан Чыпчаал Чурапчы Сылаҥыттан «Кыл түгэнэ» бөлөх (сал. Айсен Борисов) ааттанна. I Үрдэл — Амма Чакырыттан «Тэтим» бөлөх (сал. Юрий Орестов), II Үрдэл – Одунуттан «Тэтим» бөлөх (сал. Күннэй Ноговицына), III Үрдэл — Дьокуускайдааҕы А.Д.Макарова аатынан культура уонна искусство колледжа «BaArt” бөлөх (сал.Роман Кысылбаиков) буоллулар.
Номинациялар «Бастыҥ гитарист» Айтал Семеновка «Айар суол» бөлөх (Хатас), «Бастыҥ ударник» Авдей Вензельгэ «Бэйэ дьоно»(Маҥаны), «Бастыҥ вокал» Сахайаана Лукачевскаяҕа «Кыл түгэн» (Чурапчы, Сылаҥ), «Бастыҥ патриотическай ырыа» «Дайан» бөлөххө (Хаҥалас, II Дьөккөн), «Бастыҥ авторскай ырыа» — «Мөһөөх» бөлөххө (Ньурба, Мэҥэдьэк) ананнылар.
Бары күрэх кыттыылаахтарыгар үрдүк ситиһиилэри, саҥа саҕахтары баҕарабыт, үүнүҥ-сайдыҥ!
Үгүс ансаамбылга оскуола оҕолорун, ыччаттары сыһыаран, хас да көлүөнэ баара көрөргө астык. Түгэнинэн туһанан, бэйэбит «Тэтим» ВИА уолаттарын ситиһиилээхтик кыттыбыккытынан эҕэрдэлиибит. Нэһилиэккэ музыка кэрэ эйгэтин саҥаттан саҥа хайысхатын сайыннарар, ситимнээх үлэни тэрийэр, идэтигэр бэриниилээх Күннэй Ноговицынаҕа Махтал тылларын аныаҕыҥ.
«Далаһа» пресс-киинэ