Атырдьах ыйын бүтэһик күннэригэр Дьокуускайга “Бэргэн” СК төрүт оҕунан ытааччыларга аһаҕас күрэхтэһии буолла. Көмүс күһүнү көрсө ыытыллыбыт күрэхтэһиигэ охчуттар кыайыылааҕы үс көрүҥ түмүгүнэн быһаарсыбыттара, саҥа сүүрээн быһыытынан улахан биһирэбили ылла. Ол курдук, сэттэ хамаанда уонна спортивнай кулууптар спортсменнара оҕунан, рогатканан ыттылар уонна дартс быраҕыытыгар бастыҥ ааты былдьастылар.
Биирдиилээн көрүҥнэргэ Горнайтан Зинаида Платонова оххо бастакы, дартска үһүс миэстэни ылла. Анна Кириллина рогаткаҕа иккис уопсайга үрүҥ көмүс мэтээлинэн наҕараадаланна. Майя Кононова оҕунан ытыыга үһүс уопсай түмүккэ, боруонса мэтээли иилинэри ситистэ.
Спортсменнар бүгүҥҥү охчуттар күннэринэн биир идэлээхтэрин, оҕолору, тренердэри, спорт бэтээрээннэрин ис сүрэхтэн эҕэрдэлииллэр. Дьолу-соргуну, ситиһиилэри баҕараллар.
Вячеслав Алексеев