Бүгүн улуус дьаһалтатыгар ойуур баһаардарынан сибээстээн, анал хамыыһыйа сүбэ мунньаҕа буолла. Горнайдааҕы лесничество салайааччыта Ирина Алексеева Горнай сиригэр-уотугар баар баһаардары билиһиннэрдэ.
Ол курдук, Кыакамда баһаарын тустаах тэрилтэ үлэһиттэр эргийэн, хонтуруолга ылан тураллар. Сиинэ, Түгэнэ сиригэр-уотугар турбут баһаардар тэйиччи, кутталы үөскэппэт буоланнар билиҥҥитэ кэтээн көрүү ыытыллар. Ол эрэн, атын баһаардар амыраатахтарына Авиалесоохрана парашютистара барыахтара. Кэптиҥҥэ Бүлүүгэ бэлиэтэммит уот чугаһаан, тустаах үлэһиттэри кытары олохтоохтор умуллара сылдьаллар.
Оҕуруктаах ойуур баһаарыгар билигин дьон тиийбэтэ кэккэ ыарахаттардаах. Куйаас, тыаллаах күннэр тураннар эбии уустуктары таһаарар. Уот үөһэнэн көтөн барар. Ону хонтуруоллуурга элбэх киһи наада. Сирэ-уота маардаардаах, үрэхтэрдээх буолан, тиһиликтээх тыраахтырдар миэстэтигэр тиийэллэригэр туспа кыһалҕаны көрсөллөр. Октябрьскай, Атамай дьаһалталара көмөҕө ДТ-75 тыраахтардары ыытарга бэлэмнэрин биллэрдилэр.
Кэптин, Мытаах, Кировскай нэһилиэктэригэр турбут баһаардарга олохтоохтору кытары Дьокуускайтан, Тааттаттан, Чурапчыттан Авиалесоохрана, “Якутлесресурс” ГАУ үлэһиттэрэ уот салгыы барарын тохтоторго түбүктээх үлэни ыыталлар. Ону таһынан, тиэхиньикэ үлэтигэр улахан болҕомто ууруллар.
Улуус баһылыга Никита Андреев хамыыһыйа кыттыылаахтара биир сүбэнэн улууска ыксаллаах быһыыны-майгыны биллэрэргэ быһаары ылыннылар. Бэрдьигэстээх, Мытаах олохтоохторугар мобилизация биллэрэн, ойуур баһаарын умулларыытыгар күүстээх үлэни ыытарга сорудахтанна.
Вячеслав Алексеев