Улууска чөл, доруобай, чэгиэн олоҕу көҕүлүүр туһуттан киэҥ хабааннаах үлэ ыытыллара кэрэхсэбиллээх. Быйыл остуол тенниһинэн дьарыктанар дьон, федерация өйөбүлүнэн, улуус Лигатын тэрийэн бэйэ икки ардыгар бэртээхэй күрэхтэһиини ыыттылар. Онно биир сүрүн төрүөтүнэн Афанасий Парфенов аатынан комплекска спорт бу көрүҥүн киинэ арыллыбыта буолар диэтэхпинэ, спортсменнар сөбүлэһиэхтэрэ.
Кулун тутар ыйтан саҕаламмыт оонньууларга тоҕус киһи күөн көрүстэ. Биир ыйтан ордук барбыт күрэхтэһии түмүгүнэн кыайыылаах үрдүк аатын Родион Николаев,иккис миэстэни Василий Алексеев, үсүһү Валентин Петров ылла. Федерация салайааччыта Валентин Петров барыларыгар сыаналаах бэлэхтэри уунан соһутта. Спортсменнар теннискэ сыһыаннаах малы-салы тутан астыннылар. Уолаттар Лига тэриллибитин сэҥээрбиттэрин биллэрэн, салҕанарыгар баҕа санаалаарын эттилэр.
Остуол тенниһин таптааччыларыттан ураты, улууска бастакынан футболистар Лига тэрийэн саҕалаабыттарын бэлиэтиэх тустаахпыт. Кинилэр үтүө холобурдара хас спорт көрүҥүн ахсын баар буоллаҕына спордунан дьарыктаныан, бэйэ доруобуйатын, туругун көрүнүөн баҕалаах дьон элбии турарыгар саарбахтаабаппыт.
Вячеслав Алексеев