Сыл бүтүүтүгэр тахсыбыт «Бор детдома» кинигэҕэ Илья Прокопьевич Филиппов туһунан ахтыы баар.
Кини бу детдомҥа иитиллибит. Кинигэҕэ кыыһа Дьокуускайга олорор «Мой бизнес» Киин отделын салайааччыта Анна Ильинична Филиппова аҕатын кэпсээннэрин олус истиҥник суруйбут.
Илья аҕата Атамай олохтооҕо Прокопий Степанович ыал буоларыгар, баай ыал огдообо кийииттэрин күрэтэр. Малын-салын барытын илдьэ бараллар. Ол эрээри дьоно билэ охсон эккирэтэн, ситэллэр, аналын төттөрү былдьаан ылаллар.
Эдэр дьон онно кыһаллыбакка аттарыгар мэҥэстибитинэн, санаммыт сирдэригэр көтүтэ тураллар.
Кэлин былдьаабыт дьон, биир сундууктан ураты малларын-салларын төннөрөллөр, өссө алы гыналларыгар көрдөһөллөр.
Илья аҕата сэриигэ тылланан барар, хорсуннук сэриилэһэр. 1942 с. балаҕан ыйын 12 күнүгэр өлбүтүн туһунан биллэрии кэлэр.
Кэргэнэ кыһын холкуос сүөһүтэ ууга түспүтүн быыһаары, тымныйан ыалдьан уһаабат, олохтон барар.
Тулаайах хаалбыт Ильяны Филиппов Романнаах (Абааһы Романнаах) ииттэ ылаллар. Онтон өр буолбат Роман эмиэ сэриигэ ыҥырыллан, Ылдьааны Бор детдомугар ыыталлар. Кэлин детдом туһунан сырдык өйдөбүллээҕин, оҕолоругар кэпсиир эбит.
Мааны ыал, тапталлаах аҕа үтүө үлэһит буолар, Сангаарга олохсуйар, неби, гааһы чинчийэр экспедицияҕа араас омуктары кытта ситиһиилээхтик үлэлиир. Элбэх наҕараадалардаах.
Кини өрүү ийэтэ били аҕатынаан күрүүллэригэр былдьаппыт сундуугун туһунан, сотору-сотору кэпсиирэ үһү. Ийэтэ ону саныыра, харыһыйара, кыра оҕо өйүгэр хатаннаҕа…
Ааҕааччылар бука, интернет ситимигэр суруналыыс Нина Сутакова толору хара хаптаҕастаах сундуук туһунан суруйууларын сөҕө аахпыт, көрбүт буолуохтааххыт.
Ол Роман Кононович Федоров дьонуттан хаалбыт сундуук. Билигин ыччаттара олус харыһыйан, бүөбэйдээн илдьэ сылдьаллар, » Эбээ сундууга» диэн аргыый маанылаан ааттыыллар.
Баҕар, ол сундуук Аҕа дойду Улуу сэриитин иннинэ, сыбыдах атынан күрээбит тапталлаахтар, санааларыгар туппут, былдьаппыт күндү маллара буолаарай?
Эбэтэр ол сундуук Атамай нэһилиэгин хайа эрэ ыалыгар баар буоллун?!
Баҕар, билигин ол сундуук, тулаайах буолан Атамайтан арахсыбыт Филиппов ыччаттарын кытта, Атамайдааҕы Филипповтары, аймахтарын кытта ситимниэ, чугаһатыа, билиһиннэриэ эбитэ дуу?
Эбэлэрбит барахсаттар сундууктара, билигин да сорох ыалларга мааныланан, өбүгэлэри кэпсии, үйэлэри ситимнии, былыргы сэдэх маллаах, Бочуоттаах миэстэҕэ турдахтара.
Ол туһунан кэпсиир, суруйар киһи, бука, ааҕааччылар сэргиэ этилэр.
Василий Алексеев