Соторутааҕыта Горнай улууһун депутаттарын Сэбиэтин сэттис ыҥырыылаах сессията ыытылынна. Мунньаҕы улуус депутаттарын сэбиэтин бэрэссэдээтэлэ Маргарита Константинова салайда. Улуус баһылыга Никита Андреев, Ис дьыыала Горнай улууһунааҕы салаатын начаалынньыга Александр Алексеев, хонтуруоллуур-cуоттуур уорган бэрэссэдээтэлэ Ольга Горохова, улуус сэбиэтин депутаттара кыттыыны ыллылар.
Депутаттар бэбиэскэҕэ киирбит сэттэ боппуруоһу көрдүлэр. Улуус баһылыга Никита Андреев, Ис дьыала Горнай улууһунааҕы салаатын начаалынньыга Александр Алексеев 2023 с. үлэлэрин түмүгүн иһитиннэрдилэр. Ону тэҥэ «Горнай улууһа» МО олоххо бэйэни салайыныы уорганнарыгар муниципальнай сулууспаҕа үлэлээбит дьоҥҥо саастарынан биэнсийэ кээмэ-йин олохтооһун, төлөөһүн уонна хос ааҕыы бэрээдэгин туһунан Балаһыанньаны, улуус бюджетнай процеһын балаһыанньатын бигэргэтии, «2024 с улуус бюджетыгар уонна 2025-26 сс.» быһаарыыларга уларытыылары уонна эбиилэри киллэрии, хонтуруоллуур-суоттуур уоргаҥҥа эбии үлэ миэстэтин көрүү уо.д.а боппуруостар көрүлүннүлэр.
Депутаттар маннык ыйытыылары биэрдилэр:
– «Якутия», «Больше меньше» маҕаһыыннарга арыгыны атыылыыр лицензияларын болдьоҕо;
– Бутлегардары кытта үлэ;
– Түүҥҥү «точкалары», ону тэҥэ биирдиилээн арыгы атыылыыр дьону ыйыттылар;
– Улууска дьон түөкүттэргэ албыннатыыта баар дуо?
– Л.Е.Лукина аатынан Эбии үөрэхтээһин киинин үлэһиттэрэ, төрөппүттэрэ Гагарина, Коврова уулуссаларыгар масссыыналар олус түргэнник сылдьалларын, оҕолор кэлэллэригэр-баралларыгар сэрэхтээҕин эттилэр.
– Семен Данилов аатынан Бэрдьигэстээх орто оскуолатыгар тиэхиньикэ тохтуур, киһи хаамар сирэ табыгаһа суох. Маны туоратарга туох үлэ ыытыллыан сөбүй?
– «Юный друг полиции» этэрээт улууска ханнык оскуолаларга тэрилиннэ?
– «Мичил» маҕаһыын таһыгар светофор туруохтаах боппуруоһа хайаста?
– Ис дьыала үлэһиттэрэ нэһилиэнньэҕэ опрос ыытыыларын.
– Нэһилиэнньэттэн олохтоох салайыныыга төһө ыйытыы киирбитин, онно туох үлэ барарын.
–Улууска кадрдары бэлэмнээһин хайдаҕый?
– Улууска демографическай балаһыанньа туругун;
– СВО кыттыылааҕын оҕолоругар продленка үлэтэ тохтоото, бу үлэ сөргүтүллүө дуо?
– Маҥаныга «Көтөт» учаастагар уот киириитин боппуруоһун, элбэх хайысхалаах киин тутуллуо дуо?
Ис дьыала Горнай улууһунааҕы салаатын начаалынньыга Александр Алексеев «Алкоголь» эпэрээссийэ чэрчитинэн арыгыны атыылыыр маҕаһыыннар лицензияларын, чаастарын бэрэбиэркэлэниэхтээхтэрин эттэ. Былырыын биир киһи арыгы атыылаан тутуллубут, 30 тыһ.солк ыстарааптаммыт бу хайысханан күүстээх үлэ ыытыллар диэтэ. Улууска түөкүттэр албыннарыгар икки киһи киирэн биэрбитэ бэлиэтэммит. Мошенниктартан сэрэхтээх буолар туһуттан тэрилтэлэринэн сылдьан, СМИ-га сырдатан, профилактика үлэтэ барар. Ону тэҥэ, Алмазэргиэнбанк салайааччыта Ньюргун Андреев тэрилтэ финансовой грамотность диэн тиэмэҕэ лекцияны ыыталларын эттэ. Горнайдааҕы ГИБДД начаалынньыга Гаврил Антонов Л.Е.Лукина аатынан Эбии үөрэхтээһин киинин таһыгар график оҥорон, ГИБДД массыынатын туруоруохха сөп диэн хоруйдаата. Семен Данилов аатынан Бэрдьигэстээх орто оскуолатын таһыгар суол икки өттүгэр тротуар оҥорторор наадалааҕын бэлиэтээтэ. Билигин “Мичил” маҕаһыын таһыгар массыына тохтоон ылыахтааҕын туһунан анал суол бэлиэтэ баар, светофор туруорарга былааннаах үлэ ыытыллар. ИДьМ Горнайдааҕы салаатын участковайдар сулууспаларын начаалынньыга Алексей Осипов ИДьМ хайысхатынан учуокка турар дьон олохторун-дьаһахтарын полиция, прокуратура сотрудниктара көрө-истэ, билсэ сылдьалларын сырдатта.
«Юный друг полиции» этэрээт Семен Данилов, Афанасий Осипов ааттарынан орто оскуолаларга көхтөөхтүк үлэлиир, инникитин атын нэһилиэк оскуолаларын эмиэ хабар былааннаахтар. Ис дьыала Горнайдааҕы салаатын опроһугар 346 киһи кыттыбыт эбит. Улуус депутаттарын сэбиэтин бэрэссэдээтэлэ Маргарита Константинова Ис дьыала Горнайдааҕы салаатын отчуотугар инникитин протоколга киирбит этиилэргэ төһө үлэ барбытын сырдатар наадалааҕын эттэ.
Улуус баһылыга Никита Андреев бары хайысхаларга идэлээх исписэлиистэр тиийбэттэрин эттэ. Бу хайысханан улуус дьаһалтата ХИФУ-ну кытта сөбүлэҥ, инникитин АГИКИ-ны, АГАТУ-ну кытта эмиэ сөбүлэҥ түһэрсэр былааннаахтар. Эдэр исписэлиистэр кэлэн үлэлииллэригэр олорор усулуобуйаларын хааччыйыыга болҕомто ууруллуохтаах. Ааспыт сылга нэһилиэнньэ уопсайа олохтоох салайыныыга 526 боппуруос биэрбит. Сүрүннээн экономика, ОдьКХ, социальнай эйгэ хайысхаларыгар элбэх боппуруос киирбит.
Бу ыйытыылар, этиилэр протоколга киирэн, ону толорууга, быһаарыыга былааннаах үлэ ыытыллар.