Сып-сырдыкка, нап-нарыҥҥа, уу-чуумпуга иэйэр кэрэҕэ куустаран, Эбэ кытылын устун оргууй хаама сылдьыбыт киһи. Оннук дьикти нарын, ураты иэйиилээх ырыалары Маатта Эбэ кэрэ кытылыгар бүөбэйдэнэн улааппыт биир дойдулаахпыт Полина Аргунова айар-тутар, киэҥ куйаарга көтүтэр. Кини айбыт абылаҥнаах ырыалара Дьокуускайга араадьыйа долгунугар истээччилэр куттарын тутта.
Айылҕа маанылаабыт кэрэ киһитигэр айар кута түүн нуурал чуумпуга соһуччу кутуллан киирэн, утуйар уутун аралдьытан уһугуннарар.
Иэйии хас биирдии киһиэхэ барытыгар баар. Киһи аайы араас кэмҥэ, түгэҥҥэ киирэр-тахсар соһутар, өрүкүтэр, үөрдэр, долгутар буоллаҕа…
Полина Аргунова аан бастакы «Абылыыгын» диэн ырыата ыраас тапталга, истиҥ сыһыаҥҥа, эрэл санааҕа ананар. Бастакы истээччитэ кини кыыһа Валерия буолар. Улууспутугар, өрөспүүбүлүкэҕэ биллэр ырыа айааччы, ырыаҕа уһуйааччы Карл Сидоров киниэхэ сүбэ-ама буолар. Онтон Дьокуускайга продюсер, ырыа айааччы Антон Иванов «Добун» ырыа студията салгыы сайдарыгар суолун арыйан биэрэр.
Дьэ, онтон куорсун анньынан, саҥаттан саҥа ырыалара күөрэгэй чыычаах буолан дьырылыы дайаллар. Ол курдук ааптар тылыгар, матыыбыгар толоруутугар «Эн ыллаа», «Дойдубар», » Ахтылҕан», «Сулуспар», «Абылыыгын» диэн ырыалара Саха сирин бастыҥ «Тэтим», «Виктория» араадьыйаларыгар куйаар ситиминэн дуораһыйа иһиллэр.
Ааспыт сыл Полинаҕа өссө биир ураты ситиһии тосхойор. Дьокуускайга «Түүҥҥү санааларым, үллэстэр тылларым» диэн хоһоонун хомуурунньуга күн сирин көрөн, чугас дьонугар күндү бэлэҕин утары уунар.
Айар-иэйэр долгуҥҥа куустарар биир дойдулаахпыт Полина Аргунова дойдуну, олоҕу, тапталы хоһуйар хоһоонноро кэрэ кэһии курдук тахса турдуннар. Намыын-намчы ырыалара дойдубут кэрэ ньуурун симээтиннэр, эйэлээх олоҕу түстээтиннэр.
Нина Сутакова