Ааһан эрэр 2023 с. эйиэхэ туох бэлиэ түгэни хаалларда
Үүнэр сылтан тугу күүтэҕиний
Надя Федорова, Семен Данилов аатынан Бэрдьигэстээх орто оскуолатын XI кылааһын үөрэнээччитэ:
– Бу сыл миэхэ уонна дьиэ кэргэммэр үөрүүнү, хомолтону да аҕалла. Саамай күндү киһибитин эһээбитин сүтэрдибит, улахан тургутууну көрүстүбүт. Быйыл олимпиадаларга уонна интеллектуальнай, ону тэҥэ ытыыга дьарыгым күрэстэригэр кэккэ ситиһиилэрдээхпин. Саҥа сылга оскуолабын бүтэрэбин, сүрүн болҕомтобун үөрэхпэр уурабын. Баҕа санаам спорт маастарыгар кандидат маастарын толорор былааннаахпын. Дьиэ кэргэммэр, чугас аймах-билэ дьоммор саамай күндүнү доруобуйаны, дьолу-соргуну этэҥҥэ буолууну баҕарабын.
Сулустаан Егоров, Семен Данилов аатынан Бэрдьигэстээх орто оскуолатын XI кылааһын үөрэнээччитэ:
– Улахан уларыйыылаах сыл ааһан эрэр. Үөрэх, спорт, оскуолам, улууһум олоҕор. Саамай үөрүүлээҕэ быйыл саҥа таас оскуолаҕа киирдибит, биһиги бастакы выпустар буоларбытынан киэн туттабын. Улууһум ситиһиититтэн кынаттанабын. Оскуолабытыгар баһаарынай чаас хайысхатынан түмсүүбүт хамаандата үрдүк ситиһиилэннэ. Уһук Илиҥҥи күрэххэ бастакы миэстэни ыллыбыт. Арассыыйаҕа алтыс буоллубут. Бу барыта биир кэлим үлэбит, эрчиллиибит түмүгэ дии сааныыбын. Саҥа сылга эйэлээх олоҕу, өссө үрдүк ситиһиилэри баҕарабын.
Никита Баранов, Семен Данилов аатынан Бэрдьигэстээх орто оскуолатын XI кылааһын үөрэнээччитэ:
– Сыл ситиһиилээхтик түмүктэннэ. Бэйэм Амматтан төрүттээхпин. Дьокуускайтан кэлэн, үөрэнэ сылдьабын. Спордунан утумнаахтык дьарыктанабын. Ытыыга Россия призера буолабын. Быйыл элбэх улахан куораттарынан күрэхтэргэ сырыттым. Инникигэ сыаллаах соругум табыллан иһэригэр кыһаллабын. Саҥаны элбэҕи көрдүм-иһиттим, саҥа доҕоттордоннум. Үүнээр сыл өссө чаҕылхай, саҥа сүүрээннэрдээх буоларыгар баҕарабын.
– Саха сирин Ил Дархана Айсен Николаев биһиги байыастарбытыгар улахан көмөнү оҥорор. Ил Дархан Анал этиитигэр СВО сылдьар саллааттары өйүүрүн тириэртэ. Анал эпэрээссийэҕэ сылдьар дойду бары хорсун уолаттарын ортотугар горнайдар эмиэ бааллар.
ДНР фронугар сылдьар саллааттарбыт бойобуой эҕэрдэлэрэ:
– Тапталлаах кэргэттэрбитин, оҕолорбутун, төрөппүттэрбитин, чугас дьоммутун уонна бары биир дойдулаахтарбытын, эһигини барыгытын кэлэн иһэр Саҥа 2024 сылынан ис сүрэхпититтэн эҕэрдэлиибит. Баҕарабыт барыгытыгар кытаанах доруобуйаны, уһун дьоллоох олоҕу, дьиэ кэрэҥҥитигэр Ил эйэ эрэ эҥээрдэстин.
Нина Сутакова, Вячеслав Алексеев