Бүгүн биһиги улууспутугар өссө биир ураты бэлиэ күн буолла. Ол курдук улууспут биир ыраах баар Маалтааны нэһилиэгин суола тупсарыгар улахан хардыы оҥоһулунна. Маҥаныттан тахсыыга айанньыттар улахан уустуктары көрсөр сирдэриттэн бары ирдэбилгэ эппиэттиир саҥа суол кутуллан биир кыһалҕа туоратылынна.
Аҕыс миэтэрэ туоралаах, үрдүк кутуулаах, уу ааһар түөрт турба ууруулаах V категориялаах суолу “Тулааһын” ХЭТ (дириэктэр Артур Иванов) үлэҕэ киллэрдэ. Быйыл 1 км 700 м уһуннаах суол оҥоһулунна. Бырайыагынан айан суола урукку ньуурунан барбакка, саҥа сиринэн солонон Күөх Үрүйэ таһынан быһа тахсан, сүрүн суолга холбоһуохтаах.
Улуус баһылыга Никита Андреев үлэ манан тохтоон хаалбакка кэлэр сылга ыытыллар буолбутун туһунан иһитиннэрбитин мустубут дьон үөрэ көрүстүлэр. СӨ тырааныспарын уонна суол хаһаайыстыбатын миниистирин солбуйааччы Анатолий Потапов нэһилиэнньэ олорор усулуобуйата тупсарыгар, куттала суох айан суола хааччылларыгар РФ Президенэ Владимир Путин, СӨ Ил Дархана Айсен Николаев улахан болҕомто ууран, анал бырайыак, бырагыраама быһыытынан үп-харчы көрөн, улахан үлэни ыыталларын бэлиэтээтэ. Маалтааны, Маҥаны нэһилиэктэрин баһылыктара Дмитрий Борисов, Михаил Текеянов ыытыллыбыт үлэттэн астынан туран, махталларын биллэрдилэр.
Вячеслав Алексеев