Саҥа сылы – саҥа дьиэҕэ көрсүөхтэрэ

Бүгүн Бэрдьигэстээхпитигэр биир ураты үөрүүлээх күн буолла. Ол курдук, “Сэргэлээх” түөлбэтигэр Россия Президенэ Владbмир Путин көҕүлээһининэн ыытыллар “Хаарбах туруктаах дьиэттэн көһөрүү” федеральнай бырагыраама өйөбүлүнэн тутуллубут түөрт этээстээх таас дьиэ 42 кыбартыыра олохтоохторо күлүүстэрин ылан, 2024 сылы саҥа дьиэҕэ көрсөр буоллулар.

Күлүүс туттарыытын үөрүүлээх тэрээһинигэр улуус баһылыга Никита Андреев дьон олорор усулуобуйата тупсарыгар “Хаарбах туруктаах дьиэттэн көһөрүү” федеральнай бырагыраама төһүү күүс буоларын бэлиэтээн туран, олохтоохторго бэйэтин эҕэрдэтин тириэртэ. Тутууна ыыппыт “Томтор СК” генеральнай дириэктэрэ Петр Архипов Бэрдьигэстээх нэһилиэгин баһылыгар Алексей Аргуновка ытыс дохсун тыаһын ортотугар, саҥа дьиэ сүрүн күлүүһүн туттарда.

Мустубут дьон бары сүргэлэрэ көтөҕүллэ сылдьар. Үөрэ-көтө, бэйэ-бэйэни эҕэрдэлэһэ сылдьар дьону көрүөххэ да астык. Кыбартыыраларын күлүүһүн ылбыт дьон дьиэлэрин-уоттарын туһунан үөрэ-көтө кэпсииллэр.

Лидия Алексеева, биэнсийэлээх:

– Мин Ленин уулуссаҕа турар дьиэбиттэн саҥа дьиэҕэ кэллим. Онно 20-тэн тахса сыл олордум. Манна итии, тымныы уу, суунар игин сир үрдүгэр баарыттан олус астынан турабын. Саастаах киһиэхэ ол олус наадалаах. “Хаарбах туруктаах дьиэлэртэн көһөрүү” бырагыраамма баара олус үчүгэй. Россия Президенигэр Владимир Путиҥҥа, Ил Драхан Айсен Николаевка, улуус, Бэрдьигэстээх баһылыктарыгар Никита Андреевка, Алексей Аргуновка махтаныах эрэ тустаахпын. Кэлэн иһэр Саҥа дьылынанбарыгытын эҕэрдэлиибин.

Петр Винтоняк, суоппар:

– Биһиги элбэх оҕолоох дьиэ кэргэн буолабыт. Саҥа кыбартыыра күлүүһэ туттубут. Бэйэбит ПМК түөлбэтигэр эргэ дьиэҕэ уонтан тахса сыл олорон кэллибит. Саҥа дьиэбит сылаас, сырдык барыта үлэлиир. Кыра итэҕэс-быһаҕас баарын бэйэм да көннөрүөм.

Сахаян Артамонов, тутааччы:

– Биһиги дьитэ кэргэн алта оҕолоохпут, икки сиэннээхпит.“ДРСУ” түөлбэтигэр олорбут дьиэбит эргэрэн, салгыы олорор, оҕолор улааталларыгар усулубуйа уустугуран барбыта. Хата бу “Хаарбах туруктаах дьиэлэртэн көһөрүү” бырагыраамма баар буолан, олохтоох салалта баар балаһыанньаны көрөн, санаабаппыт курдук үс хостоох кыбартыыра күлүүһүн ылбыппытыттан үөрдүбүт.

Горнайга хаһыс да сылын тутууну ыытар Петр Архипов:

– Бу дьиэ бастакы сыбаайалара ыам ыйыгар түспүттэрэ. Тутатына үлэ-хамнас саҕаламмыта. Матырыйаал игин хойутаабакка кэлэн, үлэ тохтообокко барда. Бу ыйга турбут тымныыларга дьиэ олус сылаас этэ. Ханна даҕаны алдьаныы тахсыбата. Дьон олорон бардаҕына өссө сылыйыа буоллаҕа. Саҥа тутууларга кыра итэҕэс-быһаҕас баар буолааччы, ону бэйэбит көрөн-истэн туоратыахпыт. Иннкитин бу дьиэ иннигэр оҕо оонньуур уонна спортивнай балаһаакка тутуллуоҕа. Онон үлэ-хамнас салҕанар.

Вячеслав Алексеев.