Бу күннэргэ СӨ Бырабыыталыстыбатын үлэлиир бөлөҕө өрөспүүбүлүкэ олохтоохторугар 2023 с. үлэлэтин билиһиннэрэр.
Горнайга Култуура миниистирэ Афанасий Ноев салайар бөлөҕө Бэс Күөлүн, Күөрэлээх дьонун-сэргэтин кытары көрүстэ.
Атамайга Бырабыыталыстыба эппиэтинэстээх үлэһиттэрэ саҥа оскуола, элбэх хайысхалаах киин тутуута хайа биэтэккэ кэлбитин, туох уустуктар баалларын билистилэр. Аҕа дойду Улуу сэриитигэр хорсуннук сэриилэспит буойуттар сырдык ааттарыгар сүгүрүйэн сибэкки дьөрбөтүн уурдулар.
Биирдиилээн дьону кытары көрсүһүүгэ Фекла Иванова икки саастаах сиэнэ I бөлөх инбэлиит оҕо Дьокуускайга олорон эмтэнэрин эттэ. Киин куоракка үрдүттэн сылдьан көрдөрүнэригэр дьиэ куортамнаан олорорго сыана үрдүгүн ыйан туран, доруобуйаларынан хааччахтаах дьоҥҥо көмө оҥоһулларыгар баҕа санаатын эттэ.
Библиотекарь Светлана Никифорова элбэх хайысхалаах киинҥҥэ библиотека арылларынан саҥа кинигэлэринэн, сурунаалларынан о.д.а. литературанан хааччыйарга этиилээх.
Сынньалаҥ киинин дириэктэрэ Мария Яковлева, 2021 с. иэдээннээх, улахан хоромньуну таһаарбыт ойуур баһаарыгар дьиэлэрэ умайбытын кэннэ саҥа дьиэ тутутан биэрбиттэрэ. Ол дьиэлэрин бэйэлэрэ оҥостубуттарын үрдүнэн тымныытын этэр. Тутууну ыыппыт тэрилтэ мэктиэтигэр олоҕуран, үлэтин ситэрэрин ирдиир.
Нэһилиэнньэни кытары көрсүһүүгэ биэнсийэлээх Варвара Ефремова — Горнайга промышленность эйгэтэ арыллыах курдук дэһэллэр. Ойуурга просека бөҕөтүн кэртилэр. Итиннэ тугу хоруйдуо этигитий.
— Аҕам саастаах дьоҥҥо куурусса, сибинньэ о.д.а. түргэнник ситэр кыыллары иитиигэ туох көмө оҥоһулларый.
— Биһиэхэ 65-100 саастарыгар диэри кырдьаҕас киһи элбэх. Доруобуйаларын көрүнэллэригэр ыраах киин сиргэ киирэн көрдөрөллөрүгэр ыарырҕаталлар. Онон миэстэтигэр быраас хайаан да наада.
Марина Терентьева, оскуолаҕа дириэктэри иитэр үлэҕэ солбуйааччы.
— Олох сайдыытын кытары оҕолорбут сахалыы саҥараллара аҕыйаан иһэрэ кистэл буолбатах. Төрөөбүт Ийэ тылбытын сүтэрбэт туһуттан күүстээх үлэ барыахтаах.
— Элбэх оҕолоох ийэ оҕото улаатта даҕаны, статуһун сүтэрэн кэбиһэр. Ол, сыыһа дии саныыбыт. Ийэ аата ийэ төрөтөн, улаатыннаран оҕотун туһугар мэлдьи ыалдьар. Онон статуһа хаалара сөптөөх.
— Иһэр уу боппуруоһун быһаарарга үлэ барара наадалаах.
Мотрена Ефремова, Владимир Лонгинов аатынан оскуола дириэктэрэ:
— Сэбиэскэй Союз Геройа, киэн туттар киһибит Владимир Лонгинов аатын үйэтитэргэ ыытыллар үлэҕэ, төрөөбүт сирин-уотун быһаарарга, чопчулуурга сөптөөх үлэ барыахтаах.
Мария Яковлева, сынньалаҥ киинин дириэктэрэ:
— Саҥа тутуллуохтаах киин оборудованиенан хааччыллыыта хайдах быһыылаахтык барыахтааҕый.
Юлиана Аввакумова, «Радуга» оҕо уһуйаанын иитээччитэ:
-СВО-ҕа сылдьыбыт дьон выплаталара оҕолоругар көрүллэр единай пособияҕа тоҕо дохуот курдук ааҕылларый.
Тустаах тэрилтэ үлэһиттэрэ «Кэскил» түөлбэҕэ тымныы дьилэрдээх дьиэ кэргэҥҥэ сылдьан, билиҥҥи туругун көрөн, быһаарыы ылыныахтара.
Вячеслав Алексеев